Буржгар үст, өхөөрдөм, бяцхан охины төрхөөр кино урлагт мөнхөрсөн жүжигчин Шерли Темпл Блэк 85 насанд таалал төгсчээ. Холливудын түүхэнд хамгийн алдартай бяцхан жүжигчин байсан тэрбээр даваа гаригийн орой Калифорнийн Вудсайд дахь гэртээ нас барсан талаар түүний бие төлөөлөгч албан ёсоор мэдэгджээ.

Дэлгэцийн урлагтай хар багаасаа амьдралаа холбосон тэрээр гуравхан настайдаа анх камерын өмнө гарч байсан гэдэг. 10 нас хүрэх үед нь түүний тоглосон дөрвөн кино дараалан box office-ийг тэргүүлж, тухайн үедээ нэг киноноос 50 мянган ам.долларын ашиг олж байсан нь толгой эргэм их ашигт тооцогдож байв. 

Түүнд алдар хүнд дагуулсан анхны кино нь 1932 онд дэлгэцнээ гарчээ. Хэрсүү гэдэг нь жигтэйхэн буржгар үст бяцхан охины хөгжилтэй түүхийг өгүүлэх цуврал киногоороо тэр алдартай. Бүтэн 18 жилийн турш тэр дэлгэцийн урлагт хүч сорьж, цовоо сэргэлэн бяцхан охины дүрээр дэлхийн сая сая үзэгчдийг сэтгэлд үлджээ.

Шерли Темпл 22 нас хүртлээ кинонд тоглож, Чарльз Блэк хэмээх эртэй гэрлэснээр овгоо Темпл Блэк болгон өөрчилжээ. Хуримаа хийж, айлын эзэгтэй болсноос хойш Шерли эгэл жирийн, нам гүм амьдрал сонгож, олны нүднээс зайдуухан амьдрахыг хичээх болжээ. Ингээд тэр дипломат ажилтан болов. 1969-1974 онд НҮБ-д АНУ-ыг төлөөлөн сууж, 1974-1976 онд АНУ-аас Ганад суух Элчин сайдаар ажиллаж, хожим нь1989-1992 онд Чехословакт мөн элчингээр суужээ.