Сочигийн олимпийн наадмыг монголчууд TV-5 телевиз болон гадаадын спортын сувгуудаар хүлээн аван үзэж байгаа ч зарим IPTV үйлчилгээний хэрэглэгчид, ялангуяа “Юнивишн”-ий хэрэглэгчдэд олимп шууд үзэх суваг байхгүйгээс үзэгчид гомдол тавьж буй. Тэгвэл “Юнивишн” компани эл асуудлыг шийдвэрлэж, үзэгчдэд олимп шууд үзүүлэх боломжийг судлан ажиллаж байгаа аж. Энэ талаар тус компанийн ажилтнаас тодрууллаа.

-“Юнивишн” хэрэглэгчдийн багц дахь сувгууд дунд олимп шууд хүлээн авч үзэх суваг байхгүй байгаа. Гэхдээ энэ асуудлыг шийдэхээр ажиллаж байгаа гэж сонслоо?

-Тийм ээ, бид хэрэглэгчдийнхээ хүсэлтэд нийцүүлж, олимпийн суваг байрлуулахаар ажиллаж байна. Өвлийн олимпийн наадмыг TV-5 телевиз өөрдсийн гуравдугаар сувгаараа шууд дамжуулж байгаа. Тиймээс бид тус телевизтэй тохиролцсоны дагуу олимп дамжуулж байгаа III сувгийг хэрэглэгчдэдээ хүргэхээр техникийн ажлуудаа шуурхай гүйцэтгэж байна. Ойрын нэг, хоёр өдөрт багтаан асуудлыг шийднэ.

-“Юнивишн”-д олимп шууд дамжуулж байгаа “Россия 1” зэрэг спортын сувгууд байдаггүй. Оросын сувгуудаас нэмэх боломжтой юу?

-Тийм боломж хараахан байхгүй. Гадаадын сувгуудаас гэвэл Euro sport сувгаар олимпийн зарим төрлийг шууд дамжуулж байгаа. Энэ сувгаас үзэж болно. Тун удахгүй TV-5 телевизийн III сувгаас мөн хүлээн авч үзэх боломжтой болно.

-“Юнивишн”-ий хэрэглэгчид нийт хэдэн суваг хүлээн авч үздэг вэ?

-Багцаасаа хамаараад дээд тал нь 91 энгийн суваг, 49 HD суваг хүлээн авч үздэг.