Энэ шуудангийн хайрцаг нь илгээмжийн аюулгүй байдлыг бүрэн хангах олон улсын стандартын да­гуу хийгджээ. Илгээмж авах хү­ний иргэний үнэмлэх болон хурууны хээг мэдэрдэг байна. Тус шуудангийн хайрцаг нь 50 нүд­тэй бөгөөд шуудангийн хайрцаг багтаамж гурван төрөл бөгөөд та ачааныхаа хэмжээнээс хамаараад том, дунд, жижиг гэсэн хэмжээнээс сонгох боломжтой байна. Том хэм­жээ нь 420.370.610 милометр, дунд хэмжээ 420.235.610 милометр ха­рин жижиг нь 420.100.610 мило­метр хэмжээтэй аж. Мөн ухаалаг шуудангийн хайрцаг нь мэдрэгчтэй дэлгэц, процессор, карт болон бэлэн мөнгө уншигч, баркод скайнер, гурав жи модем, терминал принтер болон спикер, микрофон, камер, дохиоллын сис­тем зэрэг сүүлийн үеийн бүхий л технологийг шингээсэн ашиглахад хялбар төхөөрөмжтэй аж. Ухаалаг шуудангийн хайрцагийг “Нью-Соник” компа­ни хийж гүйцэтгэж байгаа бөгөөд нэг байршлын шуу­дангийн хайрцагийг 35 сая төгрөгөөр суурилуулж байгаа аж. Мөн мэдээллийн дэвшилтэд тех­нологи ашиглан шуудангийн үйлчилгээг түргэн шуурхай авах, 24 цагийн турш илгээмж хүлээж авах боломж бүрдэх юм. Уг ухаа­лаг шуудангийн хайрцаг эхний ээлжинд зөвхөн шуудан хүлээж авах үйлчилгээг үзүүлж байгаа гол дараагийн ээлжинд шуудан илгээх үйлчилгээг нэвтрүүлэх гэнэ.

Нийслэлийн хэмжээнд 20 шир­хэг ухаалаг шуудангийн хайр­цагийг байрлуулах аж. Үүнээс 18-ыг нийслэлд, хоёр шуудангийн хайрцагийг Эрдэнэт болон Дархан хотод суурилуулна гэж төлөвлөжээ. Энэ сарын 28-нд багтааж бүх төхөө­рөмжийг байрлуулж дуусгах гэнэ. Эхний ээлжинд Яармаг дах “Вива” хороолол, 32-ын тойргийн Бүрэн плаза, Баянхошуу дах “Боса” худалдааны төв болон Төв шууданд нээх гэнэ. Бусад шуудангийн хайр­цагийг Мэдээлэл технологийн парк, Баянзүрх дүүргийн Засаг даргын тамгын газрын байр, Хужирбулан, Хөдөө аж ахуйн их сургуулийн төв байр, Чингис хаан олон улсын нисэх буудал, Төмөр замын төв буудал, Сонсголон дах Зэвсэгт хүчний 013-р анги, Улсын их дэлгүүр, Зайсан дах “Оргил”, “Хоме плаза” төвүүд, 1-р хорооллын “Өнөр-номин”, 3-р хороолол дах “Номин”, Бишрэлт зочид буудалд тус тус байршуулахаар төлөвлөжээ.

Шуудангийн үйлчилгээнд шинэч­лэл хийх уг төсөлд Ерөнхий сай­дын багцын хөрөнгөнөөс 1,9 тэрбум төгрөг зарцуулж байна. Энэ сангаас өмнө нь улсын автозамын сүлжээг дагасан орчин үеийн тээвэр логистикийн үйлчилгээнд зориулж хот хоорондын шуудан тээврийн зориулалтын найман автомашин хүлээлгэн өгч байсан.

Монгол Улсын хэмжээнд бүрэн хаягжуулалтад хамрагдаагүй, гу­дамж талбайн байршил замба­раагүй байдаг. Тиймээс шуудан гэ­дэг ойлголт манай иргэдийн дунд бараг “устсан”. Тэгвэл шуу­дангийн үйлчилгээг иргэн бүрт түргэн шуурхай, бага зард­лаар хүргэх хугацаа хэмнэх, хүртээмжийг сайжруулахад нэмэр болж шуудангийн салбарын шинэ үе тавигдаж байна. Хөгжилтэй орнуудад шуудангийн салбар өн­дөр төвшинд хөгжсөн байдаг. Зарим орнуудын иргэд гэрээсээ гаралгүй шуудангаар дамжуулан парламентын сонгууль өгч, сануулах хуудас, хүсэлт, санал зэргийг гэрийн­хээ үүдний шуудангийн хайр­цагнаас авч, өгөх жишээтэй. Тэгвэл бид өнөөдөр ухаалаг шуудангийн хайрцгаар дамжуулан гадаад пас­портны мэдүүлэг, татварын тайлангаа тушаах боломж бүрдлээ.

Эх сурвалж: "УЛС ТӨРИЙН ТОЙМ" сонин