Клиникийн нэгдүгээр амар­жих газрын гурван сар үргэлжилсэн их засварын ажил дуусч, өнгөрсөн баасан гаригт эхчүүдийг хүлээн авч эхэллээ. Мэргэжлийн хяналтын ерөнхий газраас тус эмнэлгийн байранд бактериологи, эрүүл ахуй, агаар зүйн шинжилгээ хийхэд хэвийн гэж гарсан тул үйл ажиллагаагаа эхлүүлэх  боломжтой болсон байна. 

Энэ өдөр Монгол улсын Ерөн­хий сайд С.Батболд, Эрүүл мэндийн сайд С.Ламбаа, Нийслэлийн эрүүл мэндийн газрын дарга болон бусад холбогдох албаны хүмүүс тус эмнэлэгт хүрэлцэн очиж, эмнэлгийн засвар, үйл ажил­лагаатай албан ёсоор танилцав.

Монгол Улсын Ерөнхий сайд С.Батболд “Эхчүүдтэй уулзлаа, сэтгэгдэл өндөр, сайхан байна. Энэ бол эх үрсийнхээ эрүүл мэндийн төлөө бидний хийж, хэрэгжүүлэх ажлын эхлэл. Шинээр төрөх эмнэлэг барихаар төлөвлөсөн байгаа. Эдгээр ажил үе шаттайгаар хэрэгжинэ. Хоёрдугаар амаржих газар болоод шинээр байгуулагдах төрөх эмнэлэг барих 19 тэр­бум төгрөг энэ жилийн ул­сын төсөвт суусан. Шинэ төрөхийн барилгын ажлыг шуурхай, хамгийн гол нь чанар стандартын дагуу гүйцэтгэх үүргийг Эрүүл мэндийн яаманд өгсөн. Эхчүүдийнхээ үр хүүхдээ төрүүлэх аюулгүй, тав тухтай орчныг бүрдүүлэх нь төр засгийн үүрэг. Энэ үүргийнхээ дагуу УИХ, Засгийн газраас үе шаттай ажил хэрэгжүүлж байгаагийн нэг нь Нэгдүгээр төрөхийн засварын ажил бай­лаа” гэж тус эмнэлгийн засвар­тай танилцах үеэрээ ярьлаа.

Тус амаржих газрын дар­га Д.Энхбаяр энэ үеэр “Бид барилгын засварын ажлаа энэ сарын 1-нд хүлээж авсан. Өнөөдрийг хүртэлх хуга­цаанд ариутгал, цэвэрлэгээ халд­варгүйжүүлэлт хийж, Мэр­гэж­лийн хяналтын газраас үйл ажил­ла­гаагаа хэвийн явуулж болно гэсэн дүгнэлт гарсны дагуу эхчүүдээ хүлээн авч байна. Манай эмнэлэг нийт 240 ортой, одоогийн байдлаар 26 эх төрөхөөр ирээд байна” гэв.

Тус эмнэлгийн барилгын зас­варын ажилд 2.1 тэрбум төг­рөгийг зарцуулсан юм. Эмнэл­гийн нөхцөлд тохирсон сантехник, агааржуулалтын сис­темийг иж бүрнээр нь сольсон учраас дахин бохир халих асуудал гарахгүй гэж албаныхан ярьж байна. Түүнч­лэн тус амаржих газрын хойд талын хоёр давхар хуучин барилгад түрээсийн үйл ажиллагаа явуулдаг хувийн эмнэлэг, эмийн сангуудыг бүгдийг нүүлгэн уг барилгыг нурааж, найман давхар орчин үеийн төрөх эмнэлэг барина хэмээн Эрүүл мэндийн сайд С.Ламбаа энэ үеэр мэдэгдлээ.

П.Наран