МАН-ынхан сар шинийн гуравны энэ өдөр Тусгаар тогтнолын ордондоо золгоцгоожээ. МАН-ын дарга М.Энхболд, экс дарга Ө.Энхтүвшин, Сү.Батболд нар сар шинийн золголтод ирээгүй байна.

М.Энхболд даргыг намын гишүүдтэйгээ хийх золголтод ирээгүй шалтгааныг аав нь тэнгэрт хальсан тул энэ жил сар шинэ хийгээгүй байх талтай гэж хэлж буй юм. Харин МАН-ын хуучин удирдлагууд болох УИХ-ын гишүүн Ө.Энхтүвшин, Сү.Батболд нар яагаад ирсэнгүй вэ гэдэг тодорхойгүй байна.

Хэдийгээр намын удирдлага ирээгүй боловч сар шинээ тус намын гишүүд ахмад настай УИХ-ын гишүүн Д.Дэмбэрэлд золгож хүндэтгэл үзүүлснээр эхлүүлсэн байна. Мөн энэ удаагийн сар шинийн золголтыг ерөнхий нарийн бичгийн дарга Ж.Мөнхбат гардаж зохион байгуулжээ.

МАН-ынхан өнөөдөр золголтоо хийсэн бол МАХН-ынхан маргааш Цагаан ордондоо 09.00 цагаас золгох мэдээлэл байна. Харин эрх баригч хүчин болох Ардчилсан намын хувьд мөн маргааш шинэлэх бололтой.