Английн “Премьер лиг”-ийн 23 дугаар тойргийн тоглолтууд боллоо. Энэ тойрогт “Манчестер Сити” “Тоттенхэм” багийг талбайд нь 5:1-ийн хожиж, дэлхийн хамгийн олон үзэгчтэй, зөв менежменттэй гэх Английн хөлбөмбөгийн дээд лиг “Премьер лиг”-ийг тэргүүлж эхэллээ. Лигийг удаан хугацаанд тэргүүлсэн Лондоны “Арсенал” энэ тойрогт тэнцэж, оноо алдсанаар хоёрдугаар байр луу ухарлаа. 

Английн энэ цаг үеийн хүчирхэг багууд болон “Манчестер Сити” болон “Тоттенхэм” багуудын тоглолт энэ тойргийн хамгийн том тоглолт байсан юм.

Тоглолтын 15 дахь минутад “Манчестер Сити” багийн довтлогч Серхио Агуэро гоол оруулснаар зочид тэргүүлж эхэлсэн. Харин хоёрдугаар үеийн 50 дахь минутад “Тоттенхэм” багийн жигүүрийн хамгаалагч Данни Рөүз торгуулийн талбайд алдаа гаргаж, улаан хуудас авч талбайг чөлөөлсөн “Манчестер Сити”-д илт давуу хожих боломжийг олгосон юм. Торгуулийн цохилтыг 2013 оны Африк тивийн шилдэг хөлбөмбөгч Яя Туре амжилттай болгон, зочид хоёр гоолоор тэргүүлж эхэлсэн. Улмаар Эдин Жеко 53, Стивен Йоветич 78, Винсен Компани 89 дахь минутад гоол оруулснаар “Манчестер Сити” лигийн хүчирхэг өрсөлдөгчөө талбайд хожлоо. Харин 59 дэх минутад “Тоттенхэм” багийн хагас хамгаалагч Эттьен Капуэ гоол оруулж, багтаа нэр төрийг авчирсан юм.

Мөн энэ тойргийн бас нэгэн чухал тоглолт “Ливерпүүл” болон “Эвертон” багуудын хооронд өрнөсөн. 222 дахь удаагийн Ливерпүүл хотын дэрбид “Ливерпүүл” баг өрсөлдөгчөө 4:0-ийн харьцаатай илүүрхэн хожсон. 222 дахь дэрби тоглолтын 22 дахь минутад “Ливерпүүл” багийн ахлагч Стивен Жеррард гоол оруулсан гэсэн сонирхолтой баримт байна.

23 дугаар тойргийн тоглолтын дүн:

• Манчестер Юнайтед 2:0 Кардифф Сити
• Норвич Сити 0:0 Ньюкассль 
• Саутхэмптон 2:2 Арсенал 
• Свонси Сити 2:0 Фулхэм
• Кристал Палас 1:0 Халл Сити 
• Ливерпүүл 4:0 Эвертон 
• Астон Вилла 4:3 Уэст Бромбич 
• Сандерлэнд 1:0 Стоук Сити 
• Челси 0:0 Уэстхэм 
• Тоттенхэм 1:5 Манчестер Сити

23 тойргийн дараах байдлаар 53 оноотой “Манчестер Сити” баг “Премьер лиг”-ийг тэргүүлж эхэлсэн. Харин 52 оноотой “Арсенал”, 50 оноотой “Челси”, 46 оноотой “Ливерпүүл” багууд удаах байруудад бичигдэж байна. Өнгөрсөн жилийн “Премьер лиг”-ийн аварга “Манчестед Юнайтед” 40 оноотой долдугаар байрт бичигдэж байна. Энэ жилийн “Премьер лиг”-ийн аваргын төлөөх өрсөлдөөн өмнөх жилүүдээс ч илүү өрсөлдөөнтэй болох магадлалтай байна.

Тэгвэл 19 оноотой “Уэстхэм”, “Фулхэм”, 18 оноотой “Кардифф Сити” сүүлийн гурван байрт бичигдэж байна. Сүүлийн гурван байрт шалгарсан баг доод лиг рүү унадаг. Гэвч энэ жил доош унах багуудын хоорондох өрсөлдөөн мөн л ширүүн өрнөх бололтой. Английн “Премьер лиг”-ийг 11 дүгээр байрт бичигдэж буй “Свонси Сити” баг гэхэд 24 оноотой байна.   

Мэргэн буучийн жагсаалтыг “Ливерпүүл” багийн довтлогч Луйс Суарес 23 гоолтойгоор ганцаар тэргүүлж байна.