Сэтгэл Сэргээм сагсан бөмбөгийн Үндэсний Супер лигийн Бүх оддын тоглолт амжилттай  болж өнгөрсөн. Харин өчигдөр буюу даваа гарагт лигийн гуравдугаар тойргийн тоглолтууд үргэлжлэн явагдлаа. Мөн энэ өдөр Олон Улсын Сагсан Бөмбөгийн Холбооны шүүгч, Мексик улсын иргэн Gabriel Ramirez манай улсад хүрэлцэн ирж, анхныхаа тоглолтуудыг шүүсэн. Түүний хувьд тун өрсөлдөөнтэй болж байгаа Үндэсний Супер Лиг дуустал тоглолтуудыг шүүн явуулах юм.

Эхний тоглолт “Баянгол Гурван Тамир” болон “Дорнод Танан Гарьд” багуудын хооронд болсон. Эдгээр багууд ес болон 10 хожилтойгоор лигийг тэргүүлж байсан. Мөн 2 багууд сүүлийн үед дараалсан олон хожил аваад байсан учир маш сонирхол татсан тоглолт байлаа.

Мөн эдгээр багуудын эхний 2 тойргийн тоглолтуудад Танан Гарьд баг хожоод байсан. Гэсэн ч сүүлийн үед маш сайн тоглолт үзүүлж байгаа “Баянгол Гурван Тамир” баг тоглолтыг эрч хүчтэй эхлүүлж, эхний үеийг 35-20 харьцаатай тэргүүлсэн. Улмаар тэд тоглолтын 3-р үед тоглолтыг 20 гаран онооны зөрүүтэй болгож тэргүүлж эхэлсэн. Гэсэн ч өнгөрсөн улирлын аваргууд амархан бууж өгөхийг хүсээгүй. Минутын амралтын дараагаар Гарьдууд сэргэлт авч,улмаар тоглолтын 4-р үед онооны зөрүүг 2хон оноо болтол нь ойртуулж чадсан. Энэ тоглолтонд Гарьдуудаас Dane Rawlins 25 оноо, 17 самбар, С.Батбямба 21 оноо, 3 оновчтой дамжуулалт, Freddie Woods 18 оноо, 7 самбар, Б.Мөнхболд 16 оноо, 8 самбар авчээ. Мөн Монголын шигшээ багийг төлөөлж, Америк легионер тамирчдын эсрэг тун сайн тоглосон М.Отгонмөнх энэ өдөр бага зэрэг бэртэлийн улмаас талбай дээр цөөхөн минутыг өнгөрүүлж, 11 оноо авчээ. Мөн Гарьдуудын легионер тоглогч Joe Davis бэртлийн улмаас тоглолтонд оролцоогүй.

Харин “Баянгол Гурван Тамир” багийнхан энэ удаад томоохон сорилтыг даван гарч, онооны давамгайллаа алдахгүй явсаар 103:98 харьцаатай хожлоо. Гурван Тамир багаас Chris Lawson 23 оноо, 10 оновчтой дамжуулалт, Б.Даваажав 18 оноо, Э.Цэрэнбаатар 16 оноо, 12 самбар, Austin Witter 12 оноо, 12 самбар, Г.Цэнгүүнбаяр 11 оноо авчээ. Ингэснээр Гурван Тамир баг дараалсан 7 дахь хожлоо авлаа. Мөн нийт 10 дахь хожлоо авч, Танан Гарьд багтай ижил, 10 хожил, 5 хожигдолтойгоор, лигийг тэргүүлж байна. Харин “Дорнод Танан Гарьд” багийн дараалсан 6 хожил ийнхүү тасалдаж байна.

2 дахь тоглолт “Сүхбаатар SBL Хасын Хүлэгүүд” болон “Баянзүрх Их Өргөө Аравтууд” багуудын хооронд болсон. Эдгээр багууд мөн л плэй-оффын байрлалын төлөө өрсөлдөж байгаа ч баталгаатай болоогүй байгаа учир маш чухал, хариуцлагатай тоглолт болох байлаа.

Тиймээс ч тоглолт тун сонирхолтой эхэлсэн. Тэр дундаа Америк легионер тамирчдын эсрэг тоглолтонд Монголын шигшээ багт хожил авчирсан Т.Санчир эхний үед гайхалтай байж, 20 оноо авсан. Улмаар түүний сайн тоглолт энэ өдрийн турш үргэлжилж, энэ улиралд трипл дабль хийсэн 3 дахь тоглогч боллоо. Тэрээр энэ өдөр 35 оноо, 10 самбар авч, 12 оновчтой дамжуулалт өгсөн байна. Мөн Б.Билгүүн 21 оноо, 9 самбар, бүх оддын тоглолтын ур чадварын тэмцээний аварга О.Сэргэлэн 12 оноо, 5 оновчтой дамжуулалт, Luiz Guzman 10 оноо, 5 оновчтой дамжуулалт, Чу Мадуабум 7 оноо, 18 самбар, 5 блок, А.Бямбадорж 9 оноо, З.Дэлгэрням 8 оноо авчээ. Ингэснээр энэ тоглолтонд 114:98 харьцаатай “SBL Хасын Хүлэгүүд” баг хожиж, улирлын 9 дахь хожлоо авлаа. Ингэснээр Хүлэгүүд баг Гарьдууд болон Гурван Тамир багуудын араас, 1хэн хожлын зөрүүтэй 3-р байранд бичигдэж байна.

Харин “Баянзүрх Их Өргөө Аравтууд” багаас Д.Мөнхтүвшин багаа тэргүүлж 37 оноо авч, 5 оновчтой дамжуулалт өгсөн байна. Мөн Aundra Williams 17 оноо, 16 самбар, 5 бөмбөг таслалт, Dash Harris 15 оноо, 6 оновчтой дамжуулалт, С.Пүрэвцэрэн 12 оноо, 6 самбар, бүх оддын тоглолтын холын зайн шидэлтийн аварга Э.Цэвэлдорж 11 оноо авчээ. Ингэснээр Аравтууд 7 хожил, 9 хожигдолтой болж байна. Тэд улирлын сүүлийн тоглолтуудаа Эрдэнэдрийлинг Ригс болон Гурван Тамир багуудтай хийх юм.

Үндэсний супер лигт ирэх лхагва гарагт эхний тоглолт “Говь-Алтай МонТорх” болон “Увс Эрдэнэдрийлинг Ригс” багуудын хооронд болох бол 2 дахь тоглолт “Баянгол Гурван Тамир” “УБ Альянс Тех ШУТИС-н Харцага” багуудын хооронд болно.