УИХ-ын чуулганы үдээс хойшхи хуралдаан Ерөнхий сайдад тавьсан асуулгаар үргэлжлэв. Гэвч дараагийн асуудлуудыг хэлэлцэн, санал хураалт явуулах гэсэн боловч гишүүдийн ирцээс болж түр завсарлахаас аргагүй байдалд хүрэв.

Танхимд өглөө ирц бүрдэж чуулган эхэлсэн ч үдээс хойшхи хуралдаандаа гишүүд ирсэнгүй. Ирсэн хэдийнх нь нилээд нь чуулганы танхимаас цувж гарсаар сүүлдээ 13 гишүүн л үлдсэн байлаа.

Тиймээс УИХ-ын дарга З.Энхболд “Чуулганы танхим Ардчилсан намаас 3,  бие даагчдаас 1,  Шударга ёс бүлгээс  3,  МАН-аас 6 гишүүн л байна. Өрөөндөө сууж байгаа гишүүд чуулганы танхимдаа яаралтай орж ирэх шаардлагатай байна. Ирц хангалтгүй байгаа тул чуулганыг 15:45 цаг хүртэл завсарлуулъя” гээд хуралдааныг түр хаалаа.