Сэтгэл сэргээм Үндэсний Супер Лигийн 3-р тойргийн тоглолтууд өчигдөр Спортын төв ордонд үргэлжлэн явагдлаа. Плэй-оффт орох эрхээ аль ч баг баталгаажуулаагүй байгаа учраас багуудад тоглолт бүр чухал болоод байгаа.

Эхний тоглолт “Увс Эрдэнэдрийлинг Ригс”, “Сүхбаатар SBL Хүлэгүүд” багуудын хооронд болсон. Эдгээр багууд ижилхэн 7 хожил, 6 хожигдолтой явж байсан, мөн энэ улирлын хоорондын тоглолтын харьцаа ч 1-1 байсан юм. Мөн хожсон баг нь плэй-оффын байранд бичигдэж, хожигдсон нь плэй-оффын байрлалын гадна бичигдэж эхлэх байсан учраас маш хариуцлагатай тоглолт болсон. Тиймээс Спортын төв ордон ч дүүрэн үзэгчидтэй байлаа.

Мөн энэ тоглолтонд “Эрдэнэдрийлинг Ригс” багийн 3 дахь легионер тоглогч Lavione West хүрэлцэн ирж, анхныхаа тоглолтонд оролцсон. Энэ жил 24 настай тэрээр, 3 номерын байрлалд тоглодог хэдий ч 2 м өндөртэй, Southwest Minnesota-н их сургуулиас тоглодог байжээ. Тэрээр энэ өдөр талбай дээр цөөхөн минутыг өнгөрүүлсэн ч, 16 оноо авч амжсан. Харин Chris Moore 15 оноо, 17 самбар, Corey Bethea 13 оноо, 4 бөмбөг таслалт, Б.Батжавхлан 13 оноо, С.Өрнүүнбилэг 8 оноо, 8 самбар авчээ. Ингэснээр Ригсүүд энэ өдөр багаараа тааруухан байж, 79 оноо авсан.

Харин “SBL Хүлэгүүд” баг энэ тоглолтонд тун сайн бэлтгэлтэй ирсэн гэдгээ харуулж, гайхалтай тоглолт үзүүлсэн. Тэд багаараа үүргээ тун сайн гүйцэтгэж, тоглолтын оноог эхнээсээ л тэргүүлж эхэлсэн. Тэр дундаа багийн онооны лидерүүд болох Б.Билгүүн, Т.Санчир нар тус бүр 32 оноо авч багаа тэргүүлсэн. Мөн Б.Билгүүн 5 самбар, 5 оновчтой дамжуулалт, 7 бөмбөг таслалт хийсэн бол Т.Санчир 6 самбар авчээ. Мөн О.Сэргэлэн энэ өдөр сэтгэл сэргээсэн олон гоё тоглолт хийж, 11 оноо, 8 самбар, 13 оновчтой дамжуулалт өгчээ. Харин А.Бямбадорж сэлгээнээс тун өндөр буюу 83 хувьтай довтолж, 21 оноо авсан бол Чу Мадуабум хамгаалалтын гол ачааг үүрч тоглон, 12 оноо, 17 самбар авчээ. Мөн Horace Bond 4 оноо, 11 самбар авсан байна.

Ингэснээр энэ тоглолтонд 117:79 харьцаатай “Сүхбаатар SBL Хүлэгүүд” баг хожиж, улирлын 8 дахь хожлоо авлаа. Ингэснээр Хүлэгүүд хүснэгтийн 3-р байр хүртэл ахисан бол, Эрдэнэдрийлинг Ригс 7 хожил, 7 хожигдолтой болж, хүснэгтийн 5-р байранд үлдлээ.

Хоёр дахь тоглолт “Баянзүрх Их Өргөө Аравтууд” болон “УБ Альянс Тех ШУТИС-н Харцага” багуудын хооронд болсон. Эдгээр багууд ч мөн плэй-оффын байрлалын төлөө ширүүн өрсөлдөж байгаа. Энэ тоглолтонд Харцагуудын багийн ахлагч Б.Одбаяр бие халаалтанд оролцсон хэдий ч, талбай дээр гарч тоглоогүй.

“Баянзүрх Их Өргөө Аравтууд” багийн хувьд нэгдүгээр тойргийг тааруухан өндөрлүүлсэн хэдий ч, хоёрдугаар тойрогт олон гайхалтай хожил авч, плэй-оффын байрын төлөө өрсөлдөж байгаа. Гэхдээ Аравтууд, Харцагуудын эсрэг тааруухан байж, эхний 2 тойрогт 2-ууланд нь хожигдоод байсан.

Харин энэ удаад Аравтууд тун хүчтэй эхлэл хийж, эхний үед 34:11 харьцаатай илүүрхэж чадсан. Гэсэн хэдий ч, тоглолтын 2-р үед Харцагууд гайхалтай эргэн ирэлт хийж, эсрэг багтаа ердөө 10 оноо алдаж, өөрсдөө 29 оноо авчээ. Ингэснээр эхний хагаст оноог 40:44 болгож ойртуулсан.

 Ингэснээр тоглолт эцсийн мөч хүртлээ өрсөлдөөнтэй үргэлжилсэн. Харин тоглолтын онооны давамгайлал бага зэрэг Их Өргөө Аравтууд багт хадгалагдсаар, цаг дуусах дөхөж байхад тэд 5 оноогоор тэргүүлж байлаа. Гэсэн ч тоглолтын сүүлийн 2 минутанд Харцагууд оноог нөхөж чадсан. Энэ тоглолтонд Харцагуудаас Marcus Hammonds  26 оноо, 14 самбар, Б.Дорждамба 16 оноо, 10 самбар, Г.Баттөр 12 оноо, 6 оновчтой дамжуулалт, Watt Demond 12 оноо, 19 самбар, М.Цолмонхүү 11 оноо, 5 оновчтой дамжуулалт өгчээ.Улмаар цаг дуусахад 1 минут үлдээд байхад Hammonds-н холын зайн шидэлт амжилттай болсоноор, оноог 83-83 болгон тэнцүүлсэн.

Харин энэ үед Аравтууд баг алдаа авч чадсан. Тэд өнгөрсөн даваа гарагт Танан Гарьд багийг 10 оноогоор хожиж явсан ч, торгуулийн шидэлтүүдээ алдаж, улмаар хожигдоод байсан. Харин энэ удаад олдсон торгуулийн шидэлтүүдээ алдалгүй хийж, торгуулиас нийт 80 хувьтай шиджээ. Энэ тоглолтонд Аравтуудаас Dash Harris 21 оноо, Д.Мөнхтүвшин 19 оноо, 10 самбар, 7 оновчтойд дамжуулалт, Aundre Williams 14 оноо, 11 самбар, Э.Цэвэлдорж 11 оноо, 6 самбар, Corey Boone 10 оноо, 8 самбар, С.Пүрэвцэрэн 9 оноо, 5 самбар авчээ. Улмаар энэ тоглолтонд “Баянзүрх Их Өргөө Аравтууд” баг 88:83 харьцаатай хожиж, улирлын 7 дахь хожлоо авлаа. Ингэснээр тэд Эрдэнэдрийлинг Ригс багтай зэрэгцэн ирж, плэй-оффын төлөөх дайралтаа хүчтэй үргэлжлүүлж байна.

Сэтгэл сэргээм Үндэсний Супер Лиг ирэх баасан гарагт завсарлана. Харин энэ амралтын өдрүүдээр сагсан бөмбөг сонирхогч хүн бүрийн хувьд том баяр болох “Бүх Оддын Тоглолт” болох гэж байна. Үндэсний Супер Лигийн “Бүх Оддын Тоглолт-2014” энэ бямба, ням гарагт 13 цагаас Буянт Ухаа Спортын Ордонд болно.