Монголын үндэсний сагсан бөмбөгийн холбооны “Супер лиг”-ийн бүх оддын тоглолт энэ амралтын өдрүүд буюу нэгдүгээр сарын 25, 26-ны өдрүүдэд Буянт-Ухаа дахь спортын цоцолборт болно. Энэ удаагийн бүх оддын тоглолтын тасалбар 5000 төгрөг байх юм. Харин МҮСБХ сагсан бөмбөг сонирхогч залуустаа зориулж, тамирчдын ширүүн өрсөлдөөнийг хамгийн ойроос буву талбайн хажуугаас үзэх боломжийг олгох үүднээс VIP тасалбарыг худалдаалахаар болсон байна. VIP тасалбарын үнэ 10 мянган төгрөг бөгөөд 200 ширхэг аж. 

Бүх оддын тоглолтын үзэгчид амралтын өдрүүдэд 11:00 цагаас Спортын төв ордны гаднаас Буянт-Ухаа спорт цогцолбор хүртэл үнэ төлбөргүй зорчино.

Энэ удаагийн Бүх оддын тоглолт манай оронд өмнө нь болж байгаагүй тун өвөрмөц, содон хэлбэрээр явагдах болно гэдгийг зохион байгуулагчид хэлж байна.

Ингээд 2014 оны Бүх оддын тоглолтын хуваарийг сонирхуулъя.

2014 оны нэгдүгээр сарын 25:

Тэмцээн 13:00 цагаас эхэлнэ.

-Монголын шигшээ баг, Супер лигийн легионер тоглогчдын халз тоглолт
-Монголын баг болон легионер багийн шилдэг холбон тоглогчдын Багийн ур чадварын тэмцээн
-Монголын баг болон Легионер багийн шилдэг мэргэн буучдын холын зайн шидэлтийн тэмцээн
-Монголын баг болон Легионер багийг шилдэг тоглогчдын Two Ball тэмцээн
-Урлаг, спортын оддын шоу тоглолтууд

Нэгдүгээр сарын 26:

Тэмцээн 13:00 цагаас эхэлнэ.

-Үндэсний Супер лигийн шилдэг тамирчдын тоглолт
-Сэтгэл сэргээм Ур чадварын тэмцээн
-1990-ээд оны шилдэг сагсан бөмбөгчид, багийн эзэд, эмэгтэй тоглогчдоос бүрдсэн багийн шидэлтийн тэмцээн
-Two ball тэмцээн
-Гайхамшигт Sprite SLAM DUNK тэмцээн
-Урлаг, спортын оддын шоу тоглолт