Афганистаны нутгаас нэг триллион ам.долларын үнэлгээ бүхий ашигт малтмалын орд олсон тухай АНУ-ын эрдэмтдийн энэ долоо хоногийн эхээр хийсэн мэдээлэл батлагдаад зогссонгүй энэ хэмжээ гурав дахин их буюу 3 триллион ам.долларын хэмжээнд хүрсэн гэж өнөөдөр гаргасан мэдээлэлдээ Си Эн Эн баталж байна. Ихээхэн хэмжээний төмөрлөгийн болон зэс,кобальт, алт зэрэг металлын нөөц бүхий ордууд тус улсад илэрсэн байна. 2006 оноос АНУ-ын эрдэмтэд, геологичдын хайгуул хийж ирсэний үр дүнд эдгээр дэлхийд томоохонд орохоор ордуудыг олж чаджээ.
Тэгэхдээ АНУ-ын геологичид 1980-аад оны үед Оросын хайгуулчдын хийж байсан судалгаан дээр тулгуурлан энэхүү хайгуулаа амжилттай дуусгасан гэж яригдаж байгаа юм. Дайны хөлд нэрвэгдэж үймээн самуунтай байгаа Афганистан улсын хувьд хүнд хэцүү байдалд байгаа улс орноо санхүүгийн хувьд өөд нь татахад энэ ордууд хэрэг болно гэж найдаж байгаа гэнэ. Афганистаны уул уурхайг хамаарах төрийн албан тушаалтнууд нь аль хэдийнээ Их Британийн талд хандаж энэхүү ашигт малтмалын томоохон ордуудад хөрөнгө оруулалт хийх боломжийг хамтран судлах саналыг тавиад эхэлсэн байна. Харин Афганистаны эрх баригчид авлигад өртөх магадлал өндөр байгаа хэмээн барууны хэвлэлүүд бичиж эхэлжээ. Мөн тэд Афганистан улсыг ЗХУ гэж байх үед Оросууд яагаад өөрийн талд байлгахыг сонирхож байсан нь одоо ил болж байна гэж бас мэдээлж байгаа гэнэ.

М.Наст