Монголын залуучуудын холбоо удахгүй болох сар шинийн баярыг угтан соёл уламжлал, шашин шүтлэг адил төстэй Азийн орнууд болох Хятад, Япон, Вьетнам, Лаос орны оюутан залуусыг хамруулсан “Цагаан сар” залуусын өдөрлөгийг зохион байгуулжээ. Өдөрлөгийг нээж МЗХ-ны ерөнхийлөгч А.Мөнхбат үг хэлсэн бөгөөд энэхүү арга хэмжээ орон орны оюутан залуусыг ойртуулан танилцуулах соёл уламжлалаа бие биедээ таниулах зорилготой төдийгүй монголд сурч буй гадаад оюутанууддаа тусалж дэмжих нь гадаадаас ирэх оюутан залуусын тоог нэмэгдүүлэхэд чухал ач холбогдолтойг онцолжээ.

МЗХ-ны нээлттэй танхимд болсон энэ арга хэмжээнд БНХАУ-ын элчин сайдын яамны нэгдүгээр нарийн бичгийн дарга Чан Ван Лон, Вьетнамын элчин сайдын яамны гуравдугаар нарийн бичгийн дарга, Лаосын элчин сайдын яамны төрийн нарийн бичгийн дарга хатагтай Ватсана Вонгфила болон гадаад дотоодын оюутан залуучууд оролцжээ. Хүрэлцэн ирсэн оюутан залуус өөрсдийн цагаан сар тэмдэглэх ёс заншлаа танилцуулан урлагын үзүүлбэр сонирхуулж, монгол тоглоом наадгайгаар хамт тоглон үндэстэн үндэснийхээ уламжлалт идээ ундааныхаа дээжийг амтлуулсан байна.

Монголд 30 гаруй орны 1500-аад оюутан суралцдаг бөгөөд БНХАУ, ОХУ- аас хамгийн олон оюутан сурдаг ажээ. Монголын залуучуудын холбоо цаашдаа монголд сурч байгаа гадаад оюутан залуусын дунд урлагын болон спортын олон төрлийн арга хэмжээ, өдөрлөгүүдийг зохион байгуулахаар төлөвлөж буй ажээ.