“Австралийн нээлттэй тэмцээн”-нд гуравт эрэмбэтэй тоглосон ОХУ-ын Мария Шарапова тэмцээнээ дуусгаж байна.

Тэрбээр 1/8-д Словакийн Доминика Сибулковад 6:4, 4:6, 1:6-ийн харьцаагаар ялагдсанаар шөвгийн наймд шалгарч чадсангүй.

Австралийн нээлттэй тэмцээнд долоо дахь удаагаа оролцож буй Словак теннисчний хувьд шөвгийн наймд шалгарснаар тус тэмцээний оргил амжилтаа үзүүлээд байна. Доминика Сибулкова 20-т эрэмбэлэгдэн тоглосон бөгөөд хагас шигшээд шалгарах эрхийн төлөө Сербийн Янковичийг буулган авсан Румын Симона Халептай оноолт таараад байна. 

Өчигдөр тэмцээнийг тэргүүлэн тоглосон АНУ-ын Серена Уильямс Сербийн Ана Ивановичид ялагдсан бол өнөөдөр Мария Шарапова тэмцээнээ дуусгаж байна. Өдгөө шилдгүүдээс 2012, 2013 оны аварга Беларусын Виктория Азарека, дөрөвт эрэмбэйтэй тоглож буй БНХАУ-ын Ли На нарын шилдгүүд шалгараад байна. Өнөө шөнө тавд эрэмбэтэй тоглож буй Польшийн Агнешка Радваньска vs Испанийн Мугуруза нарын тоглолт болж, шөвгийн наймын теннисчид бүрэн тодрох юм.

Эрэгтэйчүүдийн шөвгийн наймд урьдын таамаглаж байснаар Испанийн Рафаэль Надаль, Сербийн Новак Жокович, Их Британы Энди Маррей нарын шилдгүүд шалгараад байна. Энэ цагт Швейцарын Рожер Федерер, Францын Жо Уильфред Цонга нарын тоглолт болж байна.