УИХ-ын чуулганы үдээс өмнөх хуралдаанаар Малын индексжүүлсэн даатгалын тухай болон түүнийг  дагалдах хуулийн төслүүдийг хэлэлцэж, дэмжлээ. Энэ хуулийг дагалдаж, Даатгалын тухай хуульд нэмэлт, өөрчлөлт оруулах тухай, Статистикийн тухай хуульд нэмэлт оруулах тухай, Төрийн болон орон нутгийн өмчийн тухай хуульд нэмэлт оруулах тухай, Санхүүгийн зохицуулах хорооны эрх зүйн байдлын тухай хуульд нэмэлт, өөрчлөлт оруулах тухай хуулийн төслүүдийг хэлэлцэх эсэхийг хэлэлцсэн юм. Хуультай холбоотой асуулт асуусны дараа гишүүд саналаа илэрхийлсэн юм.

Малын индекжүүлсэн даатгалыг өмнө нь гурван аймагт туршиж байсан нь амжилттай болсон учраас ийнхүү орон даяар хэрэгжүүлэхээр хуулийн төслийг санаачилсан юм. Мал бага хоргоддог газар эрсдэлийн хувийг бага, их гэдгээр нь зохицуулалт хийх нь зүйтэй гэдгийг гишүүд хэлж байлаа. Гишүүд санал хэлсний дараа Малын индексжүүлсэн даатгалын тухай хулийн төсөл болон дагалдах хуулийн төслүүдээр  санал хурааж 93 хувийн саналаар хэлэлцэх нь зүйтэй гэж үзсэн юм. Тиймээс хуулийн төслүүдийг холбогдох байнгын хороодод шилжүүллээ. Ингээд үдээс өмнөх чуулганы хуралдаан өндөрлөж, үдээс хойш 14.00 цагт Засгийн газрын цагаар үргэлжлэхээр боллоо.