Монголын Үндэсний сагсан бөмбөгийн холбооны Үндэсний Супер лигийн Бүх оддын тоглолт энэ сарын 25, 26-нд Буянт-Ухаа дахь спортын  цогцолборт болох гэж байна. Онцлогтой нь, энэ удаагийн Бүх оддын тоглолт урьд өмнө байгаагүй шинэлэг хэлбэрээр болох гэнэ. Тодруулбал, Бүх оддын тоглолтын эхний өдөр Монголын шилдэг тамирчид болон легионеруудын хооронд халз тулаан өрнөнө. Ингэхдээ хоёр багийн тамирчид халз тоглолт хийж, холбон тоглогчдын ур чадварын тэмцээн, мэргэн буучдын холын зайн шидэлтийн тэмцээн, холбон тоглогчдын two-ball тэмцээнээр өрсөлдөж, тэмцээн тус бүрээс оноо цуглуулж, ялагчаа тодруулах гэнэ. Мөн энэ өдөр урлаг, спортын оддын шоу тоглолт болох аж. Тэмцээн тухайн өдрийн 13.00 цагт эхэлнэ.

Харин хоёр дахь өдөр нь 13.00 цагаас Бүх оддын тоглолт эхэлнэ. Тоглолтын үеэр мэдээж ур чадварын, холын зайн шидэлтийн, Two-ball, слэм данкийн уламжлалт тэмцээнүүд болохоос гадна 1990-ээд оны шилдэг сагсан бөмбөгчид, багийн эзэд, тоглогчид, эмэгтэй тоглогчдоос бүрдсэн багийн шидэлтийн тэмцээн болох юм.

Дашрамд, Бүх оддын тоглолт болох 25, 26-нд Спортын төв ордноос Буянт-Ухаа дахь цогцолбор руу автобусаар үнэ төлбөргүй үйлчлэх ажээ.