Урлаг, соёлын нэрт хүмүүс сүүлийн үед уран бүтээлээ нийгмийн хөгжилтэй уялдуулан олон сайхан ажил хийх болжээ. Морин хуур чуулгын гоцлол дуучин Ардын жүжигчин Ш.Чимэдцэеэ Хөгжим бүжгийн дунд сургуульд багшлахын зэрэгцээ докторын зэрэг хамгаалах, Т.Норовбанзад багшийнхаа тухай илтгэл тавих, “Бүүвэйн дуу”-ны цомгоо гаргасан гээд тун завгүй явна. Алдарт дуучин маань Монголын биет бус соёлын өвийг хадгалж, хөгжүүлж яваа цөөхөн хүмүүсийн нэгд тооцогддог.

Энэ жил нийгэм лүүгээ чиглэсэн хэд хэдэн ажлыг хийнэ хэмээн даруухан өгүүлж суусан тэрбээр “Алтан овооны авшигт холбоо” нэртэй ТТБ байгуулжээ. Удирдах зөвлөлийн бүрэлдэхүүнд нь Монгол Улсын СГЗ Г.Мэнд-Ооёо, ДБЭТ-ын захирал Б.Сэргэлэн нарын уран бүтээлч, ажил хэрэгч хүмүүс багтаж байгаа аж.
“Алтан овооны авшигт холбоо” нь авъяаслаг уран бүтээлчдийг дэмжих, уран бүтээлийг нь олонд хүргэхээс гадна бизнес, улс төр гээд бүх л салбарт ирээдүйтэй, зорилготой, тэмүүлэлтэй хүн бүрийг дэмжин хамтран ажиллах юм байна.

Г.Даша