Тэр дахиад ч авахыг хүсч байна...

Сүүлийн дөрвөн жилд гурван ч удаа Мессигийн энд хүрэлгүй бүдэрсэн Криштиан Рональду энэ жилийн гала арга хэмжээнд оролцохгүй гэж байлаа. Гэхдээ түүний эргэн тойрон дахь хүрээлэгчид, мэргэжлийн хөлбөмбөгчид, хөлбөмбөгийн экспертүүд, тоймчид гээд нэлээд олон хүний ятгалгаар тэр дэлхийн шилдгийг зарлан тунхаглах ёслолын арга хэмжээнд очихоор шийдсэн гэнэ. Тэгэх тэгэхдээ хайртай бүсгүйгээ, бяцхан хүүгээ, аав, ээжтэйгээ хамт Цюрихт зочилсон Криштиан Рональду FIFA /Олон улсын хөлбөмбөгийн холбоо/-гаас шалгаруулдаг дэлхийн шилдэг хөлбөмбөгчөөр тодорч, Ballon d’Or хэмээх эрхэм шагнал гардав.

Дөрвөн жил дараалан дэлхийн шилдэг хөлбөмбөгчийн алдар хүртэж, түүхэн амжилтын эзэн болсон Мессигийн хувьд өнгөрсөн 2013 он азгүй, одгүй байсан гэж болно. Гэмтэл, бэртлээс болж багагүй хугацааг талбайн гадуур өнгөрүүлсэн нь магадгүй Рональдуд давуу тал олгосон биз. Клубын төвшинд ч тэр, олон улсын тавцанд ч тэр “Реал Мадрид” болон Португалийн шигшээ багийн хамт ганц ч цом өргөөгүй хэдий ч Рональду өнгөрсөн улиралд 56 тоглолтод 66 гоол оруулжээ. Ингэхдээ “Реал” Испанийн Эзэн хааны цомын тэмцээний финалд шалгарч, Аваргуудын лигийн их шөвөгт үлдсэн амжилтыг нь үнэлэхгүй байж боломгүй. Басхүү хөлбөмбөгийн дэлхийн аварга шалгаруулах тэмцээний сонгон шалгаруулалтад Португалийн шигшээгийн гол тулах хүч нь байж, шигшээ багаа амжилтад хөтөлсөн нь түүнд дэлхийн шилдэг хэмээх цол авчирлаа.

Өнгөрсөн хоёрдугаар сард төрөлх Мадейра хотноо өөрийн нэрийн музейтэй болсон тэрбээр одоо үзмэрийн танхим дахь “Алтан бөмбөг”-өө ихэрлүүлж тавихаар боллоо. 2008 онд “Манчестер Юнайтед”-ын цэрэг байхдаа дэлхийн шилдэг хөлбөмбөгчөөр шалгарч байсан Рональду одоо энэ эрхэм шагналыг нэг бус удаа гардсан цөөн хэдэн тоглогчийн нэг болж байна. Түүхэнд ийм амжилт гаргасан хөлбөмбөгчийг тоолбол гарын 10 хуруунд багтана.

2013 оны Ballon d’Or-ын эзнийг тодруулахаар дэлхийн 184 улсын хөлбөмбөгийн шигшээ багийн дасгалжуулагч, тэдгээр багийн ахлагч нар, дэлхийн хэвлэл, мэдээллийн байгууллагын төлөөлөл болсон 173 спортын сэтгүүлчийн саналыг нэгтгэжээ. Ингээд эцсийн шатанд тунаж үлдсэн Рональду, Месси, Фрэнк Рибери нараас Рональду 1365 оноо, Месси 1205, Рибери 1127 оноо авсан байна.

Бразилийн домогт тоглогч Пеле индэр дээрээс түүний нэрийг зарлахад Рональду дэргэдээ суусан үзэсгэлэнт найз бүсгүйгээ үнсээд, хүүгээ дагуулаад тайзан дээр гарсан. Дэндүү их баярлаж, сэтгэл хөдөлж буйгаа хэлэхдээ нулимсаа барьж дийлээгүй тэрбээр энэ эрхэм шагналыг саяхан таалал төгссөн Португалийн агуу хөлбөмбөгч Эйсебиод зориулахыг хүсч буйгаа хэлсэн юм. Тэрбээр ёслолын дараа сэтгүүлчид өгсөн ярилцлагадаа “Шударга эсэхийг нь хэлж мэдэхгүй юм. Үнэнийг хэлэхэд надтай адил Рибери ч энэ шагналыг гардах боломжтой байсан. Миний хувьд өнгөрсөн улирал гайхалтай байсан. Би энд дахин ирж, дахин энэ агуу шагналыг авахыг хүсч байна” хэмээжээ. Мөн тэрбээр тайзан дээр нулимс унагасан тухайгаа “Ээж минь их уяхан хүн. Амархан уйлчихдаг юм. Түүнийг уйлж байгааг харахаар сэтгэл хөдлөөд өөрийн эрхгүй дагаад уйлчихдаг” хэмээн цайруулсан гэнэ. Өрсөлдөгч Мессигийн талаар Рональду “Би хөлбөмбөгчийн хувьд Месситэй үргэлж холбоотой байдаг. Тэр бол миний шүтэж, хүндэлж явдаг тоглогч. Ийм шилдэг өрсөлдөгчтэй байна гэдэг азтай хэрэг” гэжээ.

FIFA-гийн 2013 оны шилдгүүдийг танилцуулъя.

Ballon d’Or:

Криштиан Рональду
Лионель Месси
Фрэнк Рибери

Дэлхийн шилдэг эмэгтэй хөлбөмбөгч:

Надин Ангерер
Эбби Уамбах
Марта

Дэлхийн шилдэг дасгалжуулагч (эрэгтэйчүүдийн багийн):

Юпп Хайнкес
Юрген Клопп
Сэр Алекс Фергусон

Дэлхийн шилдэг дасгалжуулагч (эрэгтэйчүүдийн багийн):

Силвия Найд
Ральф Келлерманн
Пия Сандхейж

Пушкашийн нэрэмжит шагнал

Златан Ибрагимович
Неманья Матич
Неймар

Бэлгэдлийн шигшээ баг:

Мануэл Нойер, Дани Алвес, Филипп Ламм, Серхио Рамос, Тиаго Сильва, Андрес Иньеста, Фрэнк Рибери, Шави, Криштиан Рональду, Златан Ибрагимович, Лионель Месси

Хүндэтгэлийн шагнал: Пеле

Шударга өрсөлдөөний шагнал: Афганистаны хөлбөмбөгийн холбоо

Ерөнхийлөгчийн нэрэмжит шагнал: Жак Рогге

2000 оноос хойшхи Ballon d’Or-ын эзэд: