Монголын хип хоп ертөнцийн томоохон төлөөллүүдийн нэг “Ice Top” хамтлагийнхан тун удахгүй тоглолтоо хийхээр төлөвлөжээ. Тэд ирэх сарын 1-нд “Best of Ice top” нэртэй тоглолтоо фенүүддээ хүргэхээр зэхээд буй.

Сүүлийн үед манай рок попын төлөөлөл болсон залуу уран бүтээлчид өөрсдийн гаргаж буй CD болон тоглолтоо “Best of” гэж нэрлэх нь цөөнгүй болжээ. Уг нь  “Best of”  тодорхойлолт нь цаг үедээ шилдэг нь байсан, ёстой л од хүмүүсийн хийдэг зүйл гэнэ. Зодог тайлсан хамтлаг дуучид эсвэл уран бүтээл хийхээ больсон уран бүтээлчид өөрсдийн тоглолт болон CD-гээ “Best of” гэж нэрлэдэг аж.

Манай урлагийн халуун тогоонд чанагдаж буй уран бүтээлчид мэдлэггүйлээ ч юм уу, мэдээлэлгүй болоод ч тэр үү хийж буй уран бүтээлүүдээ “Best of” гэж нэрлээд байдаг “мода”-тай болчихжээ. “Ice Top” хамтлагийнхан ч яагаад тоглолтоо “Best of” гэж нэрлэснийг мэдэхгүй ч мэддэг хүн нь харвал “Ice Top” хамтлаг зодог тайлах нь гэж ойлгох нь ээ.