Талбайн теннисний оны анхны “Их дуулга” болох “Австралийн нээлттэй тэмцээн” Австралийн Мельбурн хотноо өнөөдөр эхэллээ. Энэ сарын 29-н хүртэл үргэлжлэх тус тэмцээнд дэлхийн шилдэг теннисчид ганцаарчилсан, хосын болон холимог хосын төрөлд оролцож байна. 1905 оноос эхтэй тус тэмцээний энэ жилийн шагналын сан 33 сая ам.долларт багтжээ.

Тэмцээний ганцаарчилсан төрлийн нэгдүгээр тойргийн тоглолтууд эхэлсэн бөгөөд 1/32-т шалгарах эрхийн төлөөх тоглох теннисчид тодроод байна. Эмэгтэйчүүдийн ганцаарчилсан төрлийн хоёрдугаар тойрогт дөрөвт эрэмбэтэй БНХАУ-ын Ли На, зургаад эрэмбэлэгдсэн Чехийн Петра Китова болон Германы Анжилья Кербер (9), Сербийн Анна Иваннович(14), Австралийн Саманта Стосур(17) нарын шилдэг теннисчид эхний учраагаа буулган авч, шалгараад байна.

Харин тус тэмцээний 2003 оны дэд аварга, “Их дуулга” тэмцээний долоон түрүүт, АНУ-ын нэр теннисчин Винус Уильямс хоёрдугаар тойрогт шалгарч чадсангүй. Австралийн нээлттэй тэмцээнд 13 дахь удаагаа оролцож буй Винус Уильямс эхний тойрогт 22-т эрэмбэтэй тоглож буй ОХУ-ын Екатарина Макаровтой оноолт таарч, 6:2, 4:6, 4:6-ийн харьцаагаар ялагдал хүлээжээ. Түүний хувьд дүү Серенагийн хамтаар хосын төрөлд тоглох юм. Эгч, дүү Уильямсын хувьд хосын төрөлд дөрвөн удаа /2001, 03, 09-10/ түрүүлжээ.

Эрчүүдийн хувьд хоёрдугаар тойрогт гуравт эрэмбэтэй Испаний Дэвид Феррер, долоод эрэмбэлэгдсэн Чехийн Томаш Бердых нарын шилдэг теннисчид шалгараад байна.