УИХ-ын чуулганы нэгдсэн хуралдаанаар Монгол Улсын Их Хурлын чуулганы хуралдааны дэгийн тухай хуульд өөрчлөлт оруулах тухай хуулийн төслийг хэлэлцсэн ч гишүүдээс 38.6 хувийн дэмжлэг хүлээснээр уналаа. Ингэснээр энэхүү төслийг төсөл санаачлагчид буцаах шийдвэрийг гаргалаа. УИХ-ын гишүүн Р.Бурмаагийн санаачилсан эл төсөлд УИХ-ын гишүүний тангараг өргөж, бүрэн эрхээ хэрэгжүүлэхтэй холбоотой заалт тусгажээ. Энэ нь төрийн сүлдэндээ тангараг өргөснөөр УИХ-ын гишүүн бүрэн эрхээ хэрэгжүүлнэ гэж үзсэн байна.

Хэлэлцүүлгийн шатанд УИХ-ын гишүүд “Юм бүрийг өөрчлөхийг яддаг, энд тэндээс эсэн бусын юм авчирч наахыг оролддог. Тэр хэрээр парламентын нэр хүндийг улам унагадаг зарчимгүй байдлаа татах хэрэгтэй. Одоо мөрдөгдөж байгаа УИХ-ын гишүүний тангараг өргөх ёслол харин ч орчин цагтаа нийцсэн, илүү дутуу үйлдэлгүй ёслол” гэх байр суурийг түлхүү барьсан юм. Ингээд санал хураалгахад хуулийн төсөл олонхийн дэмжлэг хүлээж чадаагүй тул Р.Бурмаа гишүүн рүү буцаалаа.

Эл асуудлыг хэлэлцэн шийдвэрлэснээр УИХ-ын чуулганы баасан гаригийн нэгдсэн хуралдааныг өндөрлүүллээ.