УИХ-ын чуулганы хуралдаанаар өнөөдөр импортын буудайг татвараас чөлөөлөх хуулийн төслийг хэлэлцэх байсан ч хойшлуулсан юм. Учир нь Төсвийн байнгын хорооны хуралдаанаар хэлэлцэж байх үед  МАН-ын бүлгийн зүгээс Байгаль орчин, хүнс, хөдөө аж ахуйн байнгын хороогоор хэлэлцүүлэх санал тавьсны дагуу ийнхүү төслийг чуулганаар хэлэлцэхийг хойшлуулсан байна.
 
Тиймээс ирэх долоо хоногийн Байгаль орчин, хүнс, хөдөө аж ахуйн байнгын хорооны хуралдаанаар импортын буудайг татвараас чөлөөлөх төслийг хэлэлцэх юм байна. Үйлдвэр, хөдөө аж ахуйн яамнаас хүнсний улирлын нөөц бүрдүүлэхэд шаардагдах  100 мянга хүртэлх тонн улаан буудайг импортоор оруулж ирэх санал гаргаад байгаа юм. Ингэхийн тулд Нэмэгдсэн өртгийн албан татвар, Гаалийн албан татваруудаас 100 хувь чөлөөлөх саналыг гаргасан билээ.