Сэтгэл сэргээм Үндэсний Супер Лигийн 2-р тойргийн тоглолтууд өчигдөр үргэлжлэн явагдлаа. Эхний тоглолт “Баянгол Гурван Тамир”, “SBL Хасын Хүлэгүүд” багуудын хооронд боллоо. Эдгээр багуудын 1-р тойргийн тоглолт үзэгчийн сэтгэлийг сэргээсэн, суудлаас нь өндөлзүүлсэн болж, О.Сэргэлэнгийн баззер шотоор дуусаж байсан. Мөн эдгээр багууд 2-уулаа плэй-оффын байрлалд бичигдэж байсан учир өрсөлдөөн ширүүн болох нь тодорхой байлаа. Мөн энэ тоглолтонд NBA-н драфтаар сонгогдож байсан тоглогч, анх удаагаа монголын лигт тоглосон онцгой тоглолт болсон. “SBL Хасын Хүлэгүүд” багийн шинэхэн легионер Чуквудиебере Мадуабум анхны тоглолтонд өчигдөр оролцсон. Түүний хувьд 2011 оны драфтын 56 дахь сонголтоор NBA-д сонгогдож байсан юм.

Энэ тоглолтыг үзэхээр сагсан бөмбөгийн үнэнч хөгжөөн дэмжигчид СТО-нд дүүрэн ирсэн. Тоглолт ч үзэгчдийн хүлээлтэнд хүрч, ширүүн өрсөлдөөнтэй болсон. Тоглолтыг эхнээсээ л Хүлэгүүд оноогоор бага зэрэг давамгайлж байлаа. Мөн талбай дээр 2 багийн тоглогчидын хооронд ч уур амьсгал ширүүн байсан юм. Энэ тоглолтонд Хүлэгүүдээс Т.Санчир багаа тэргүүлэн тоглож, 35 оноо, 7 самбар, А.Бямбадорж 19 оноо, Lamar Bond 13 оноо, 17 самбар, О.Сэргэлэн 9 оноо, 10 самбар, 4 оновчтой дамжуулалт, Мадуабум 9 оноо, 7 самбар, Б.Билгүүн 8 оноо авчээ.

Харин тоглолтын сүүлийн үе үнэхээр сэтгэл сэргээсэн, галзуу болж өрнөсөн. Оноогоор хожигдож явсан Гурван Тамир баг оноог нөхөж эхэлсэн. Ялангуяа О.Цэлмэгийн холын зайн шидэлтүүд маш чухал үед оновчтой болж байсан бол, Chris Lawson, Г.Цэнгүүнбаяр нар чухал оноонуудыг авч байлаа. Энэ тоглолтонд тэднээс Chris Lawson 32 оноо, 15 самбар, 8 оновчтой дамжуулалт, Г.Цэнгүүнбаяр 23 оноо, 8 самбар, О.Цэлмэг 15 оноо, P.J.Gaynor 9 оноо, 12 самбар, А.Гансүх 8 оноо, 7 самбар, 6 оновчтой дамжуулалт өгчээ. Ингэснээр Гурван Тамир баг цаг дуусахаас 33 секундын өмнө 6 оноогоор тэргүүлж эхэлсэн. Гэсэн ч энэ үед тэд оноог холдуулах боломжтой байсан торгуулийн шидэлтүүдээ алдсан. Харин үүнийг нь Хүлэгүүдийн лидер Т.Санчир ашиглан, дараалан 6 оноо авч, тооны харьцааг 95-95 болгон тэнцүүлсэн.

Ингэснээр эдгээр багуудын 2 тоглолт, 2-уулаа нэмэлт цагт шийдэгдлээ. Харин энэ удаад ялагч нь өөр байж, “Баянгол Гурван Тамир” баг хожил авлаа. Нэмэлт цагт Austin Witter, Т.Санчир дээр хэд хэдэн чухал хамгаалалтыг хийсэн. Ингэснээр 108:101 харьцаатай Гурван Тамир баг маш чухал тоглолтонд хожлоо. Тэд ийнхүү 2-р тойрогт гайхалтай тоглож, 5 хожил, 1 хожигдолтойгоор өндөрлүүлллээ. Мөн нийт 7 хожил, 5 хожигдолтойгоор, хүснэгтийн гуравдугаар байрт орж ирлээ.

Хоёр дахь тоглолт “Дорнод Танан Гарьд” болон “Говь-Алтай МонТорх” багуудын хооронд болсон. Эдгээр багуудын 1-р тойргийн тоглолт мөн л маш сонирхолтой болж, Terrance Joyner эхнийхээ тоглолтонд оролцож, 45 оноо авч байсан. Энэ тоглолтонд Гарьдуудаас ОУХМ Г.Ихбаяр, О.Ууганбаяр нар, МонТорх багаас Quinton McDuffie нар бэртлийн улмаас тоглоогүй.

Гэхдээ тоглолт сонирхолтой болж, легионер тоглогчид 1-р довтолсон тохолтуудыг олноор нь хийсэн. Мөн энэ тоглолтонд Торхуудын лидер Terrance Joyner өөрийн амжилтаа ахиулан 47 оноо авч, Супер Лигийн энэ улирлын хамгийн өндөр оноог авлаа. Мөн тэрээр 6 самбар, 8 оновчтой дамжуулалт өгсөн бол, Joshua Guillory 26 оноо, 14 самбар, О.Нямбаяр 12 оноо, 10 самбар, Б.Батзолбоо 11 оноо, 9 самбар авчээ.

Гэсэн ч тэд ээлжит удаагаа маш олон оноо алдлаа. “Дорнод Танан Гарьд” багаараа энэ өдөр тун жигдхэн сайн тоглож, 6 тоглогч 14-с дээш оноо авсан. Тэднээс Dane Rawlins 31 оноо, 14 самбар, М.Отгонмөнх холын зайнаас 6 шидэлтээ амжилттай болгож 24 оноо, Б.Мөнхболд 23 оноо, Joe Davis 19 оноо, 9 оновчтой дамжуулалт, С.Батбямба 16 оноо, 7 оновчтой дамжуулалт, Freddie Woods 14 оноо, 19 самбар авчээ. Ингэснээр “Дорнод Танан Гарьд” багаараа нийт 142 оноо авч, 106 оноо алдсанаар, ээлжит хожлоо авлаа. Гарьдууд ийнхүү 7 хожил, 4 хожигдолтой болж байна. Тэд 2-р тойргийн сүүлийн тоглолтоо мөнхийн өрсөлдөгчид болоод байгаа “SBL Хасын Хүлэгүүд” багийн эсрэг хийнэ. Энэ тоглолт маргааш буюу баасан гарагийн 2 дахь тоглолт байна. Харин  эхний тоглолт мөн л өнгөрсөн улиралд хүрэл медалийн төлөө тоглосон 2 баг болох “Увс Эрдэнэдрийлинг Ригс” болон “УБ Альянс Тех Харцага” багуудын тоглолт байх юм. Тэгэхээр маргааш сагсан бөмбөг сонирхогчдын хувьд мөн л онц сонирхолтой тоглолт болох нь.