Монгол Улсын нэрийн хуудас болж, тив дэлхийд энх тайван, эвлэрэл тогтоох үйл хэрэгт хүчин зүтгэж байгаа энхийг сахиулагчдыг үдэн гаргах, жанжин тугандаа хүндэтгэл үзүүлэх ёслолын арга хэмжээ өчигдөр болов.  Монгол Улсын Зэвсэгт хүчний төлөөлөл болсон эдгээр 264 цэргийн албан хаагчид нь Чад улс, Төв Африкийн Бүгд Найрамдах Улсад НҮБ-ын мандаттай MINURCAT энхийг сахиулах ажиллагаанд үүрэг гүйцэтгэх хоёрдугаар ээлжийн энхийг сахиулагчид юм. Цэргийн багт 34 анги байгуулагаас шалгарсан шилдэг цэргийн албан хаагчид  багтсан бөгөөд тэдний 51 хувь нь өмнө нь энхийг сахиулах ажиллагаанд оролцож байсан туршлагтай цэргийн албан хаагчид багтсан  талаар ярьж байна. Энэ удаагийн үүрэг гүйцэтгэх багийг захирч буй Л.Гансүх “Бид сургалт дадлагаа Зэвсэгт хүчний нэгдсэн төвд богино хугацаанд, цаг агаарын хүндрүүлсэн нөхцөлд өдөр, шөнийн турш тасралтгүй өндөр түвшинд хангаж чадлаа. Манай зэвсэгт хүчин Чат, Төв Африкийн Бүгд Найрамдах Улсад явагдаж буй НҮБ-ийн мандаттай энхийн ажиллагаанд хоёр дахь ээлжийн цэргийн багаа илгээх гэж буй хэдий ч энд жагссан бүрэлдэхүүн анх удаа тухайн ажиллагааны хүчний командлагчийн мэдэлд түгэн байрлах хүчний үүрэг гүйцэтгэх гэж байгаагаараа урьд урьдын багуудын гүйцэтгэж байсан үүргээс онцлог” гэдгийг чухалчилж байсан. Чад улсад үүрэг гүйцэтгэж байгаа нэгдүгээр ээлжийн 264 цэргийн албан хаагч  өнгөрсөн оны арванхоёрдугаар сараас эхлэн зургаан сар үүрэг гүйцэтгэсэн бөгөөд  хоёрдугаар ээлжтэй ээлж хүлээлцэн, энэ сарын сүүлчээр эх орондоо ирэх юм байна.
Түүнчлэн цэргийн баг анх удаагаа бие дааж хүнс, хүн эмнэлэг, ар талын хангалтыг зохион байгуулах болсон нь манай цэргийн багийн удирдлага, бие бүрэлдэхүүнд асар өндөр үүрэг хариуцлагыг хүлээлгэж байна гэж Батлан хамгаалах яам, зэвсэгт хүчний жанжин штабаас дүгнэж байгаа аж.
Нөгөөтэйгүүр он гарсаар НҮБ-ийн мандат бүхий энхийг сахиулж буй орнуудын цэргүүд халдлагад өртөж, амь насаа алдах олон тохиолдол гарсаар байна. Энхийг сахиулах ажиллагаанд оролцож буй Монголын цэргүүд рүү ч халдахгүй гэх баталгаа байхгүй гэдэг нь ч сэтгэл түгшээж байна. Харин Зэвсэгт хүчний удирдлагууд эл асуудалд хэрхэн хандаж байгаа талаар Зэвсэгт хүчний жанжин штабын дэд дарга бригадын генерал Б.Баярсайханаас тодрууллаа.
-Энхийг сахиулах ажиллагаанд оролцож буй гадаадын цэргүүд рүү халдсан, тэдний амь насыг хөнөөсөн хэд хэдэн тохиолдол ойрмогхон гарлаа. Манайх үүнээс урьдчилан сэргийлэх, аюулгүй байдлыг хангахын тулд ямар ажил хийж  байна?
-Одоогоор манай энхийг сахиулагчид халдлагад өртөж, амь эрсэдсэн тохиолдол байхгүй.  Бид энхийг сахиулж буй бүрэлдэхүүнүүдтэйгээ байнга холбоотой байж үүрэг чиглэл өгөн, анхааран ажиллаж байна. Мэдээж хэрэг энхийг сахиулах үүрэг гүйцэтгэж буй хүмүүст амаргүй байгаа. Гэхдээ манай цэрэг, дайчид сайтар бэлтгэгдсэн, мэргэжлийн хүмүүс байгаа учраас асуудалд бодитоор хандаж, дээрээс өгсөн үүрэг чиглэлийн дагуу ажиллаж байна.
-Байнга холбоотой байна гэдэг нь ямар хугацаа вэ?
-Бид өдөр болгон тайлан мэдээ авч, үүрэг чиглэл өгч байна. Шаардлагатай тохиолдолд шууд холбоо барих техник, тоног төхөөрөмжөөр бүрэн хангагдсан гэсэн. Тиймээс энэ тал дээр санаа зовохгүй байж болно гэсэн үг.
– Сьерра Леонд энхийг сахиулж буй Монголын Зэвсэгт хүчний багийн бүрэлдэхүүнд жирэмсэн эмэгтэй байгаа нь үнэн үү?
-Тийм. Гэхдээ энэ нь тэр хүн үүргээ гүйцэтгэхэд саад болох шалтгаан биш.
-Жирэмсэн эмэгтэйг яагаад энэ багийн бүрэлдэхүүнд багтаасан юм бэ. Тэгэж болдог юм уу?
-Жирэмсэн эмэгтэйг явуулсан гэж ойлгож болохгүй. Тийм ч зүйл болоогүй. Тухайн үүрэг гүйцэтгэгч гэр бүлийн хүний хамт Сьерра Леонд энхийг сахиулах ажиллагаанд үүрэг гүйцэтгэхээр явсан юм. Харин тэнд очсоныхоо дараа нь жирэмсэн болсон гэдгийг ойлгох хэрэгтэй. Гэхдээ энэ нь ямар нэгэн дүрэм, журмыг зөрчөөгүй учраас багийн бусад гишүүний нэгэн адилаар үүрэгт хугацаандаа үүргээ гүйцэтгээд л ирнэ гэж ойлгох хэрэгтэй гэв.
 Ямартай ч Сьерра Леонд энхийг сахиулах үүрэг гүйцэтгэж байсан монгол эмэгтэй жирэмсэн болсон гэдгийг албаны хүмүүс баталж байна. Түүний биеийн байдал сайн байгаа гэнэ.