Аргентин, Чили, Болив улсад болж буй 2014 оны Дакар раллийн гуравдахь өдрийн гараанд ОУХМ Д.Болдбаатар 89, ОУХМ Н.Лхамаа 108 дугаар байрт шалгарлаа. Гуравдахь өдрийн гарааны үеэр ширүүн бороо орсон тамирчдын ур чадварыг шалгах том сорил болсон юм. Автоспортын олимп Дакар раллийн гуравдахь өдрийн гараанд Аргентиний Сан Рафаэль мужаас Сан Хуан хүртэл 373 км зайд уралдахаар байсан. Гэсэн ч борооны улмаас мотоциклийн төрөлд өрсөлдсөн тамирчид 240 км замд өрсөлджээ.

Гуравдахь өдрийн гарааны ялагчаар Хонда маркын мотоциклоор уралдаж буй Испанийн Хуан Барреда Борт 3:47:03 цагийн амжилтаар тэргүүлсэн байна. Харин Францын Кырил Деспре болон Испанийн Марк Кома нар удаах байруудад шалгарсан байна. Харин хоёр дахь өдрийн гараанд түрүүлсэн Сэм Сандерлэнд гуравдахь өдөр тун муу уралдаж, 74 дүгээр байрт шалгарсан байна. 

Гурван гарааны дараах байдлаар ОУХМ Д.Болдбаатар 80, ОУХМ Н.Лхамаа 103 дугаар байрт эрэмбэлэгдэж байна. 2014 оны Дакар раллийн мотоциклийн төрөлд 173 тамирчин өрсөлдөж байгаа юм.