МАН-ын хамгийн дуу­лиантай, бас хүлээлт үүс­гэсэн эрхмээр байнга л тодорсоор ирсэн генсек асан У.Хүрэлсүх улстөрөөс чи­мээгүйхэн завсарлага аваад байгаа ч сэм сэмхэн МАН-ын цагаан ордноор орж гарсаар яваа бололтой. Өчигдөр 11:00 цагийн үед Соёлын төв өргөөний зүүн хаалганы дэргэдүүр яаруухан алхаж явахад нь хэн нэгэн танимхайран гар барих гэвэл муухан инээчихээд алхаж одно лээ.

Хэзээний бушуу түргэн явдал, суудалтай У.Хүрэлсүх дарга ямартай ч зөвхөн Монголдоо байгаа л бололтой.

Хурандаа У.Хүрэлсүх гэгд­тэлээ Монголын улстөрд өөрийн орон зайгаа баттай эзэлсэн тэрбээр төв талбай дээр толгойдоо улаан бичиг­тэй тууз ороон цахиртсан хоолойгоор хашхирч байх­даа, намынхаа шатсан ордны туурин дээр гар зан­гидаж зогсохдоо, төрийн ордонд Г.Баярсайханыг дэл­­­сэн уна­гахдаа ч өөрийн гэсэн өнгө төрхтэй эр гэдгээ нотлох имиджээ бүрдүүлсээр ирсэн нэгэн. Тэр хэзээний л өөрийнхөөрөө хувь ганц улстөрчийн давтагдашгүй бодгалийг бүтээсэн, бүтээ­сээр яваа эр. Тэр орж чадсан шигээ УИХ-аас өөрийн хүслээр явж чадсан. Чухамдаа түүний энэ муйхар гэмээр, бас дэндүү зоримог үйлдэл өнөөдөр Монголын улстөрийг цэвэрлэх, ариус­гах, мэргэшүүлэх талд ёстой л ус, агаар мэт хэрэгтэй байна санж.

Яг үнэндээ гацаанд орчихоод дороо дэвхцэн байгаа Монголын улстөрд хачиг шиг шигдэж суугаа үлбэгэр дорой, хувиа бодсон бэртэгчин нөхдийн дэргэд У.Хүрэлсүх ядаж л зууралдан үхэлдэж, УИХ-ыг шившиглээгүй гавьяатай. Чухамдаа түүний энэ занг нь үнэлдэг болохоор түүнийг муу хэлэх хүн цөөхөн байдаг болов уу. Тэр хэрэгтэй цаг ирвэл хамгийн түрүүнд гал, ус руу харайгаад орох итгэл төрүүлээд байдаг юм.

Ямар ч гэсэн У.Хүрэлсүх Монголдоо алхаж явна. Тэр зарим нэгэн шиг Швейцарийн банкинд мөнгө нуугаагүй л болов уу. Бас зарим нэгэн шиг авгайгаа сольж, залуу хүүхэн тэврээгүй нь үнэн.

Тэр бас УИХ-ын улаан модон сандал, ширээтэй үхэлдэн зууралдаж, ичих булчирхайгүй мэт буруу, зөв­гүй бураагүй. Тэр харин бусдын л адил утаатай Улаанбаатартаа паль­тоны­хоо захыг босгочихоод яаруу­хан алхаж л явна. Ха­рин тэр хаа хүртэл алхах гэсэн юм бол.