Төсвийн байнгын хорооны өнөөдрийн хуралдаанаар Төрийн аудитын байгууллагын бутцийн ерөнхий бүдүүвч, орон тооны дээд хязгаарыг батлах тухай байнгын хорооны тогтоолын төслийг хэлэлцлээ. Төслийг боловсруулсан тухай Монгол Улсын Ерөнхий аудидор А.Зангад танилцуулсан бөгөөд Төрийн аудитын байгууллагын зохион байгуулалтын бүтцийг удирдлагын, хөгжлийн, хэрэгжүүлэх, дэмжих үйлчилгээний хэсгээс бүрдэж байхаар ерөнхий бүдүүвчийг боловсруулсан байна. Өөрөөр хэлбэл, төрийн аудитын байгууллагын орон тоо, бүтцийг шинэчлэн баталж байгаа юм байна.

Тодруулбал, тогтолцооны удирдлагын хэсэгт Ерөнхий аудитор, Аудит эрхэлсэн дэд дарга болон Ерөнхий нарийн бичгийн дарга гэсэн гурван институт хамаарах бөгөөд Ерөнхий аудиторын шууд харъялалд түүний албан хэрэгт дэмжлэг үзүүлэх хэсэг ажиллахаар, төрийн аудитын байгууллагын үндсэн чиг үүргийг хэрэгжүүлэх хэсэг нь төрөлжсөн болон орон нутгийн аудитын байгууллага байх бөгөөд аудитын үйл ажиллагааг мэргэжил, арга зүй, зохион байгуулалтаар хангаж дагнан гүйцэтгэхээр тусгажээ. Шинэчилсэн бүтцийн хүрээнд аудитын байгууллагад нийт 23 албан тушаалтан хэрэгтэй байгаа юм байна.  Хуулийн дагуу Төсвийн байнгын хорооны даргын эрхийн хүрээнд төрийн аудитын байгууллагын албан тушаалыг аудитын бүтцийг баталлаа.