Өнгөрсөн бямба гаригт “FA Cup” тэмцээний хүрээнд болсон “Арсенал” болон “Тоттенхэм”-ийн тоглолтын үеэр өвдөгний бэртэл авч талбайг чөлөөлсөн Английн шигшээ багийн довтлогч Тео Уолкотт хөлбөмбөгийн дэлхийн аварга шалгаруулах тэмцээнийг өнжихөөр болжээ. Зүүн хөлийн өвдгөндөө гэмтэл авсан тэрбээр зайлшгүй мэс засал хийлгэх шаардлагатай болсон бөгөөд зургаан сарын хугацаанд талбайд гарах боломжгүй болсон талаар “Арсенал” клубын удирдлага албан ёсоор мэдэгдсэн байна.

Энэ зун Бразильд болох ДАШТ зургадугаар сарын 12-нд эхэлнэ. Харин Английн шигшээ багийнхан нээлтийн өдрөөс хойш хоёр өдрийн дараа Италийн багийн эсрэг эхний тоглолтоо хийх юм.

Уолкоттын хувьд “Гурван арслан”-гийн төлөө 36 тоглолтод оролцож, таван гоол оруулсан, тэдгээр 36 тоглолтын 27-д Английн шигшээ ялалт байгуулж, долоон тоглолтод тэнцэж, хоёр удаа ялагдал хүлээжээ. Тэрбээр 2006 оны тавдугаар сарын 30-нд Унгарын шигшээтэй хийсэн нөхөрсөг тоглолтод анх удаа шигшээ багийн бүрэлдэхүүнд багтаж талбайд гарсан бөгөөд ингэснээр Английн түүхэнд шигшээ багаа төлөөлсөн хамгийн залуу /17 нас, 75 хоногтой/ тоглогч болсон юм.

Харамсалтай нь тэрбээр дэлхийн аваргад тоглож байсан удаагүй, энэ удаад ч бас өнжихөөр болж байна.