Хятадын Засгийн газар Киргизээс ард иргэдээ татаж үндсэндээ дуусчээ. Нийт 1300 хятад иргэнийг Киргизийн өмнөд нутгаас татаж байгаа бөгөөд хамгийн сүүлчийн хэсэг иргэдийг өчигдөр орой Киргизийн Ош хотын нисэх онгоцны буудлаас авч хөөрчээ.
Өнгөрсөн 10-ны өдрөөс Ош районд үймээн дэгдсэнээс хойш Хятадын засгийн газар Киргизэд байгаа иргэдийнхээ аюулгүй байдлыг маш чухалд үзэж, 14-ний өдрөөс эхлэн онгоц гарган иргэдээ татсан байна. Хятадын засгийн газрын иргэдээ татах ажлын хэсгийн дарга, Гадаад хэргийн яамны Консулын хамгаалалтын төвийн дарга Хэ Пин хэлэхдээ, одоо Ош-ийн нисэх онгоцны буудалд саатаж байгаа Хятад иргэн байхгүй гэжээ.