Антрактидад гацсан Оросын “Академик Шокалский” хөлөгт туслахаар очсон Хятадын усан онгоц өөрөө ч бас том мөснүүдэд хашигдан хөдөлж чадахгүй болжээ. Судалгаа шинжилгээний “Академик Шокалский”  хөлөг дээр зорчиж явсан 52 хүнийг зөөх ажиллагааг Австралийн “Aurora Australis” усан онгоцтой хамтран гүйцэтгэж байсан Хятадын “Snow Dragon” хөлөг мөсөн далайд гацаад буй аж. Харин тэднийг аврахаар энэ удаад АНУ-ын мөс хагалагч хөлөг онгоц Антрактидийг зорьсон байна.

Хятадын аврах багийнхан энэ долоо хоногийн дундуур нисдэг тэрэг  ашиглан Өмнөд туйлд гацсан “Академик Шокалский” дээр гацсан хүмүүсийг “Snow Dragon” хөлөг рүү амжилттай зөөсөн юм. Дараа нь 52 зорчигчийг Австралийн “Aurora Australis” усан онгоц руу хүргэсэн аж. Учир нь Австралийн усан онгоцны даацаас шалтгаалан Хятадын нисдэг тэргийг шууд хөлөг дээр шууд газардах боломжгүй байжээ.

Олон улсын аврах багийнхан Зул сарын оройноос хойш Өмнөд туйлын мөсөн далайд гацсан “Академик Шокалский”-н 52 жуулчин, аялагчийг  аюулгүй газарт шилжүүлсэн боловч хөлгийн багийн 22 гишүүн одоо болтол усан онгоцон дээрээ байгаа аж.