УИХ-ын Тамгын газраас эрхлэн гаргадаг “Төрийн мэдээлэл” эмхэтгэлийг 2014 оны нэгдүгээр  сарын 1-ний өдрөөс эхлэн үнэгүй тарааж эхлэх юм. Тус эмхэтгэлийг төр, захиргаа, шүүх эрх мэдэл, хууль сахиулах байгууллагууд, их, дээд, дунд сургууль, нийтийн номын сангуудад  үнэ төлбөргүй тараах юм байна.  УИХ-ын  Тамгын газрын Ерөнхий нарийн бичгийн даргын шийдвэрээр нийт 70  гаруй байгууллагад 5600 орчим “Төрийн мэдээлэл” эмхэтгэлийг үнэ төлбөргүй тараахын зэрэгцээ  түүнийг “Монгол шуудан” компанийн салбараар дамжуулан байгууллага, иргэдэд захиалах боломжийг олгожээ.

УИХ-ын Тамгын газар  2012 оноос эхлэн “Төрийн мэдээлэл” эмхэтгэлийн долоо хоног тутмын дугаар бүрийг төдийгүй  олон улсын гэрээ, конвенци бүхий “Төрийн мэдээлэл” эмхэтгэлийн тусгай дугааруудыг  цахим хэлбэрт шилжүүлж түүний хүртээмжийг нэмэгдүүлэхэд ихээхэн анхаарч ажиллаж байгаа бөгөөд Үндсэн хууль болон бусад хуулиар үйл ажиллагаа нь зохицуулагдсан цорын ганц хэвлэл “Төрийн мэдээлэл” эмхэтгэлд Монгол Улсын хууль ,УИХ-ын бусад шийдвэр, Ерөнхийлөгчийн зарлиг, Засгийн газрын тогтоол, Үндсэн хуулийн цэц болон Улсын дээд шүүхийн шийдвэр зэрэг эрх зүйн акт албан ёсоор нийтлэгддэг билээ.