Английн хөлбөмбөгийн “Премьер лиг”-ийн 2013-2014 оны улирал 19 тойргийн тоглолтоо ууд өнгөрсөн амралтын өдрүүдэд боллоо. Энэ тойрогт Лондоны “Челси” талбайдаа “Ливерпүүл” багийг хүлээн авч, 2:1-ийн харьцаатай хожлоо. Ингэснээр “Челси” хүчтэй өрсөлдөгчөө хожиж, үнэнч хөгжөөн дэмжигчдээ баярлууллаа. Тоглолтын гуравдахь минутад “Ливерпүүл” багийн хамгаалагч Мартин Шкртэл гоол оруулж, талбайн зочид тэргүүлж эхэлсэн. Гэсэн ч Жозе Моуриньюгоор удирдуулсан “Челси” дахин алдаа гаргалгүй сайн тоглосоор Эдин Азар 17 дахь минут, Самуэль Эту 34 дэх минутад гоол оруулснаар өрсөлдөгчөө буулган авсан. “Челси”-гийн довтлогчид “Ливерпүүл” багийн эсрэг тун сайн тоглосон.

Английн “Премьер лиг” 38 тойргийн тоглолтоос бүрдэнэ. Үүнээс 19 тойргийн тоглолт болоод байгаа юм. 19 тойргийн дараах байдлаар Лондоны “Арсенал” баг 42 оноотойгоор тэргүүлж байна. Харин 41 оноотой “Манчестер Сити”, 40 оноотой “Челси” багуудыг тэргүүлэгчийг нэхэж байна. Английн “Премьер лиг”-ийн аварга энэ жил тун ширүүн өрсөлдөөний дараа тодрох нь. Лигийг тэргүүлэгчдийн хоорондох тэмцэл тун ширүүн өрнөж байна. Хоёр тойргийн өмнө буюу 17 дугаар тойргийн дараа “Премьер лиг”-ийг “Ливерпүүл”, “Арсенал” багууд тэргүүлж байсан. Харин хоёр тойргийн “Ливерпүүл” тавдугаар байр луу унасан байна. “Премьер лиг”-ийг тун тааруу эхлүүлсэн, өнгөрсөн жилийн аварга “Манчестер Юнайтед” аваргын төлөөх тэмцэлд ороход бэлэн болжээ. “Манчестер Юнайтед” лигийн сүүлийн дөрвөн тоглолтод хожсоноор зургадугаар байрт дэвшиж чадлаа. Сүүлийн жилүүдэд Английн “Премьер лиг”-ийн өнгийг тодорхойлсон “Манчестер Юнайтед”, “Манчестер Сити”, “Арсенал”, “Челси”, “Ливерпүүл” багуудтай “Эвертон” баг тун ширүүн өрсөлдөж байна. “Эвертон” энэ улирал хамгийн цөөхөн буюу ердөө хоёр хожигдсон цорын ганц баг юм. “Эвертон” 19 тойргийн дараах байдлаар 37 оноотой лигийн дөрөвдүгээр байрт бичигдэж байна.

19 тойргийн дүн:  

• Уэстхэм 3:3 Уэст Бромбич Албион
• Астон Вилла 1:1 Свонси Сити 
• Халл Сити 6:0 Фулхэм
• Манчестер Сити 1:0 Кристал Палас
• Норвич Сити 0:1 Манчестер Юнайтед 
• Кардифф Сити 2:2 Сандерлэнд 
• Эвертон 2:1 Саутхэмптон 
• Ньюкассль 0:1 Арсенал
• Челси 2:1 Ливерпүүл
• Тоттенхэм 3:0 Стоук Сити

Английн “Премьер лиг”-ийн 20 тойргийн тоглолтууд ирэх нэгдүгээр сарын 11-нд эхэлнэ.

19 тойргийн дараах байдлаар 19 гоолтой “Ливерпүүл” багийн довтлогч Луйс Суарес тэргүүлж байна. Суаресын гоолын цуврал “Манчестер Сити”, “Челси” багуудтай хийсэн тоглолтын үеэр түр завсарлалаа. Тэрээр есөн тоглолтод 19 гоол оруулаад байсан юм. Харин 13 гоол оруулсан “Манчестер Сити” багийн Серхио Агуэро мэргэн буучийн хоёрдугаар байрт бичигдэж байна. Серхио Агуэро гэмтсэн байгаа.

Мөн “Манчестер Юнайтед” багийн довтлогч Уэйн Рүүни19 тойргийн дараах байдлаар тун жигд тоглолтыг үзүүлж байна. Уэйн Рүүни есөн гоол оруулж, найман оновчтой дамжуулалт өгчээ.