Шинэ жилийн баярын арга хэмжээ зохион байгуулж эхэл­сэнтэй холбоотойгоор иргэд, албан байгууллага салют буудуулах, тэсэлгээний хэрэгсэл хэрэглэх нь элбэгшдэг. Үүний улмаас хүүхэд залуус бэртэж, биедээ гэмтэл учруулсан тохиолдолд өмнөх онуудад гарч байсан юм. Иймд Нийслэлийн цагдаагийн газраас “Пиротехникийн хэрэгсэл” арга хэмжээг энэ сарын 12-ноос ирэх сарын 1-ний хооронд зохион байгуулж байгаа юм байна. Энэ жил зах болон худалдааны төвүүдээр салют, тэсэлгээний хэрэгсэл худалдан борлуулахыг хоригложээ. Зөвхөн зөвшөөрөлтэй компанид урд хөршөөс энэ төрлийн барааг оруулж ирэх эрхийг олгосон байна. Энэ талаар Нийслэлийн цагдаагийн газрын Олон нийттэй харилцах ажилтан Н.Эрдэнэмөнхөөс дараах хариултыг авлаа.

-Шинэ жилийн баярын арга хэмжээ эхэлсэнтэй холбоотойгоор салют, тэсэлгээний хэрэгслийг иргэд дур мэдэн хэрэглэснээр гэмтэх тохиолдол өмнөх жилүүдэд гарч байсан. Энэ талаар цагдаагийн байгууллага ямар арга хэмжээ авч ажиллаж байна вэ?

-Шинэ жилийн баяр болж байгаатай холбогдуулаад шинэ жилийн арга хэмжээг зөв зо­хистой тэмдэглэн өнгөрүүлэх, иргэдийг болзошгүй аюулаас сэргийлэх, пиротехникийн хэ­рэгслийг хууль бусаар хадгалах, ашиглах, худалдан борлуулахыг таслан зогсоохыг эрчимжүүлэх зорилгоор “Пиротехникийн хэ­рэгсэл” арга хэмжээг зохион байгуулж байна. Энэ арга хэмжээний хүрээнд Нийслэлийн цагдаагийн газар, Онцгой байдлын газар, Мэргэжлийн хяналтын газар хамтран зөвлөлгөөн зо­хион байгуулж, салютийн хэ­рэглээтэй холбоотой чиглэл өгсөн. Нийслэлийн иргэдийн төлөөлөгчдийн хурлын 2011 оны 27 дугаар тогтоолоор “Төрийн захиргааны байгууллагуудын байр, соёл, боловсрол, эрүүл мэндийн байгууллага, гэр хороолол, ний­тийн эзэмшлийн орон сууц, түүний ойр орчинд, барилгын зоорийн давхар, задгай талбай, худалдааны төв, хүнс, барааны зах, болон гар дээрээс пиротехникийн хэрэгслийг худалдахгүй, ашиг­лахгүй байх” асуудалыг тус тус зохицуулж өгсөн. Энэ журам мөрдөгдөж эхэлснээс хойш тодорхой үр дүн гарсан. Өмнө нь салют буудуулснаас болж хөлөө тайруулах, гараа гэмтээх, бүр амиа алдах тохиолдол гарч байсан. Харин өнгөрсөн хоёр жил энэ журам мөрдөгдөж эхэлснээр бэртэж гэмтсэн хүн гараагүй. Олон нийтийн аюулгүй байдлыг хангах, иргэдийг болзошгүй аюулаас урьдчилан сэргийлэх, баярын арга хэмжээг зөв зохистой тэмдэглэн өнгөрүүлэх зорилгоор нийслэлийн нутаг дэвсгэрт соёл урлаг, худалдаа, үзвэр үйлчилгээний чиглэлээр үйл ажиллагаа явуулж байгаа төрийн болон төрийн бус байгууллага, аж ахуйн нэгжийн барилга, байгууламж дотор пиротехникийн хэрэгслийг ашиглан салют, гэрэлт үзүүлбэр зохион байгуулахыг хориглож байгаа. Зөвхөн тусгай зөвшөөрөлтэй хоёр компани салют борлуулах эрхтэй.

-Зах болон худалдааны тө­вүүдээр борлуулагдахгүй гэсэн үг үү?

-Тийм. Зөвшөөрөлтэй хоёр компаниас бусад аж ахуй нэгж, иргэд пиротехникийн хэрэгсэл, салютийг худалдан борлуулах, хэрэглэхийг хориглосон. Зах, худалдааны төвүүдээр мөн зарагдахгүй.

-Баярын арга хэмжээний үеэр салют буудуулах болвол яах вэ?

-Байгууллага, аж ахуй нэгж шинэ жилийн арга хэмжээ зохион байгуулахдаа салют буудуулах болбол зөвшөөрөл бүхий хоёр компанид хандана. Энэ ком­паниудын төлөөлөгчид тухайн шинэ жил зохион байгуулж байгаа газарт очиж сервес үйлчилгээ үзүүлэх юм. Салют худалдаж авах мөнгөө тушааснаар мэргэжлийн операторчноор буудлага хийл­гүүлнэ. Гэхдээ иргэн бүрийн гэрт очиж буудуулах боломжгүй.