Гаалийн 12 ажилтанд арга хэмжээ авч гэнэ. Гол­дуу ажлын цагаар архидан согтуурсан, бусдын бараа, бүтээгдэхүүнийг татваргүй нэвтрүүлэхийг шаардсан, ажилдаа хайнга хандсан, албан тушаалаа урвуулан ашигласан зэрэг “номинаци”-аар тэднийг халжээ. Гаалийн ерөнхий газраас дотоод аудитын гэнэтийн шалгалт хийгээд илрүүлсэн нь дээрх 12 болохоос биш ийм зөрчил байнга шахам гардаг бололтой. Мөн 12 ажилтнаас гадна таван хүний зэрэг дэвийг бууруулж эрхийг нь хасч, 10 хүнд сануулга өгсөн гэнэ.

Архидан согтуурахын тухайд улаан хоолойтой бүхэн хэрэглэдэг хэмээн хаацайлан өнгөрүүлж болох боловч ажлын цагаар уусан гэдгээрээ халагдах хүртэл арга хэмжээгээр шийтгэж байгаа аж. Энэ талаар эдүгээ тус байгууллагын ажилтнууд “Уудаггүй хүн гэж байдаггүй. Тэгвэл робот ажиллуулах хэрэгтэй болох биз” гэж ярьсан сурагтай. Мөн албан тушаалаа ур­вуулан ашиглахын тухайд ч гэсэн тэд буруугаа эс хүлээн “Баригдсан нь л тэд болохоос гааль бол гааль шүү дээ” хэмээн ярьсанаас үзэхэд тус байгууллагад хүн ажиллаж байгаа цагт алдаа дутагдал арилахгүй гэдэгтэй ажилтнууд нь хүртэл санал нийлдэг бололтой юм. Хамгийн сүүлд л гэхэд “Гаалийн” хэмээх Х.Баатарын хэргийн дараа хэчнээн том албан тушаалтан нөхөд нь цагаа тулахаар зүсээ буруулдгийг нүдээр харснаас хойш тус байгууллага нэлээд эмх цэгцтэй болоод байсан.

Энэ удаад “жижиг” гэж өөрсдөө нэрлэж буй дутагдлаа ийнхүү өмгөөлж буй нь үнэн  бол тус байгууллагад мартсаныг нь сануулах, ха­туу гараар үзэлцэх цаг ирсэн бололтой. Түүнчлэн саяхан хэвлэлээр Гаалийн ерөн­хий газрын Төрийн захир­гаа, удирдлагын газрын дар­га О.Даваасүрэнгийн та­лаарх шүүмжлэлтэй мэдээ­лэл нийтлэгдсэн. Тухайлбал Сангийн сайдын хадам дүү болох тэрбээр “Гаалийн ахлах байцаагч болъё гэвэл…” гээд сая саяар яригдах тодорхой ханш ярьж явсан тухай уг мэдээлэлд дурьджээ. Ямартай ч Гаалийн ерөнхий газар ойрд барцад ихтэй, бас сонин сайхан мэдээлэл ихтэй байгаа ажээ.