Криштиан Рональду музейтэй болжээ. Түүний төрөлх Фуншал /Португаль/ хотод зөвхөн түүнд зориулсан музей байгуулсан бөгөөд нээлтийн ёслолд нь Криштиан Рональду оролцжээ. “CR7 Museum” нэртэй тус музейд Рональдугийн хөлбөмбөгийн карьертай холбоотой бүхий л дурсгалын зүйлсийг байрлуулсан гэнэ. Музейн нээлтийн үеэр тэрбээр “Үнэхээр онцгой өдөр тохиож байна. Би өөрийнхөө музейг нээж байна. Бахархалтай хэрэг. Миний цомнуудыг өрж тавьсан бүхэл бүтэн өрөө байна шүү дээ. Би аль нэгийг нь онцолж дурдмааргүй байна. Учир нь бүгд л миний амжилтын илэрхийлэл. Хэрвээ би Ballon d’Or авбал энд шагналын цомоо байрлуулах хангалттай зай байна” хэмээжээ.

Дашрамд, FIFA-гаас оны шилдэг хөлбөмбөгчид олгох Ballon d’Or шагналын эзнийг ирэх нэгдүгээр сард зарлана. Уг шагналд эцсийн байдлаар Рональдугаас гадна Лионель Месси, Фрэнк Рибери нар тунаж үлдээд буй билээ.