Оюутолгой ХХК-ийн Төлөөлөн удирдах зөвлөлийн ээлжит хуралдаан өнөөдөр Улаанбаатар хотноо болж байна. Эл хуралдаанд оролцох  гадаад талын ТУЗ-ийн  гишүүд  Монголд ирээд хоёр хонож байгаа бөгөөд ТУЗ-ийн хуралдааны өмнө тус компанийн ТУЗ-ийн байнгын хорооны хуралдаан болсон гэж албан бус эх сурвалж хэлж байна.

Өнгөрсөн есдүгээр сард  Лондон хотноо хуралдсан Оюутолгойн ТУЗ шийдвэрлэх ёстой асуудлынхаа талыг нь нааштай байдлаар шийдсэн хэмээн ТУЗ-ийн Монголын талын төлөөлөгчид мэдээлж байсан. Харин энэ удаагийн хурлаар Лондонгоос үлдсэн асуудалд санал нэгдэж, тус компанид тулгараад байгаа гацааг арилгах болов уу гэсэн хүлээлт эдийн засагчдын дунд байна.  Тухайлбал,  ТЭЗҮ-д заасан анхны хөрөнгө оруулалт 40 орчим хувиар нэмэгдсэн шалтгааныг тодруулах, манай тал ногдол ашгаа хэзээ авч эхлэх зэрэг олон асуудлыг энэ хурлаар шийдвэрлэх бололтой.