Хуваарийн дагуу баасан гаригт болох байсан ч Спортын төв ордны сагсан бөмбөгийн шитний самбар хагарсны улмаас хойшлогдоод байсан Үндэсний супер лигийн “Сүхбаатар СБЛ Хасын хүлгүүд” болон “Баянзүрх Их Өргөө Аравтууд” багийн тоглолт өчигдөр боллоо. Лигийн тэмцээн эхэлснээс хойш тус тус хоёр хожил, нэг хожигдолтой байсан хоёр багийн тоглолт ширүүн өрсөлдөөн дунд өрнөв. Тус тоглолтод “Хүлгүүд”-ийн төвийн тоглогч О.Сайнбаяр болон дасгалжуулагч О.Баярцогт нар эргэн ирсэн бол “Аравтууд”-ын дасгалжуулагч Ц.Цэвэрбал эзгүй байлаа.

Тоглолт 88:75 харьцаагаар “Хүлгүүд”-ийн ялалтаар өндөрлөсөн. Тус тоглолтод Д.Мөнхтүвшин багаа тэргүүлж, 22 оноо, есөн удаагийн самбараас бөмбөг авалт, хоёр блок шот гүйцэтгэсэн бол Cory Boone 16 оноо, 15 самбар, Э.Цэвэлдорж 15 оноо, 9 самбар, С.Пүрэвцэрэн 12 оноо, 7 самбараас бөмбөг авалт гүйцэтгэжээ.

Дашрамд, ”Баянзүрх Их Өргөө Аравтууд” баг Т.Санчирыг бүрэлдэхүүнээсээ хасч байгаагаа албан ёсоор МҮСБХ-нд мэдэгсэнээр лигийн журмын хүрээнд чөлөөт тоглогч болсон. Ингэснээр Т.Санчир “Сүхбаатар SBL Хүлгүүд” багаас тоглох албан ёсны эрхтэй болж байгаа юм. Тэрээр Үндэсний супер лигийн хоёрдугаар тойргоос буюу энэ сарын 16-наас эхлэн шинэ багийнхаа бүрэлдэхүүнд тоглоно.

Үндэсний супер лигийн ээлжит тоглолтууд өнөөдөр 18.00 цагт Спортын төв ордонд “Монторх” болон “Хүлгүүд” багийн тоглолтоор эхэлнэ. Мөн өнөөдөр “Аравтууд” баг “Гурвантамир”-тай тоглоно.