Монгол Оросын хамтарсан Эрдэнэт үйлдвэрийн зөвлөлийн хуралдаан 50 дугаар хуралдаан хоёр өдөр үргэлжилж өндөрлөлөө. Хуралдаанаар хоёр улсын хамтарсан үйлдвэрүүд болох Эрдэнэт, Монголросцветмет үйлдвэрүүдийн өнөөгийн байдлын талаар онцлон хэлэлцжээ. Дээрх үйлдвэрүүдийн хувьд хамгийн их тулгамддаг асуудал болсон техник, технологийн шинэчлэлийг ирэх онд хэрэгжүүлэх шийдвэрийг Засгийн газар хоорондын хуралдаанаас гаргасан байна. Өнгөрсөн онд л гэхэд Эрдэнэт үйлдвэрт 37 сая ам.долларын хөрөнгө оруулалт төлөвлөж байсан бол энэ жил зургаан сая ам.доллараар нэмэгдүүлж, 43 сая ам.долларын хөрөнгө оруулахаар шийджээ. Үүгээр Эрдэнэт үйлдвэр өөрөө бутлах цехээ шинэчлэн дэлхийн хөгжилтэй орны төвшинд хүргэх боломжтой гэж холбогдох албаныхан хэллээ. Түүнчлэн Эрдэнэт үйлдвэр ажиллагсдынхаа нийгмийн асуудлыг шийдэхэд төдийгүй Орхон аймгийн бүтээн байгуулалтад идэвхтэй оролцдогийг бодолцон Эрдэнэт хотод зам тавих хөрөнгийг ч мөн шийдсэн байна.

Хурлын бас нэгэн анхаарал татсан асуудал нь хамтарсан үйлдвэрүүдийн өр зээл юм. Энэхүү өр зээлийг үе шаттай шийдэх, харилцан бие биедээ үүссэн өрийг бүтээгдэхүүн борлуулах хэлбэрээр шийдэхээр болжээ. Одоогийн байдлаар Эрдэнэт, Монголросцветмет үйлдвэрүүд 5,5 тэрбум төгрөгийн өртэй юм байна.