Английн хөлбөмбөгийн “Премьер лиг”-ийн 14 дүгээр тойргийн тоглолтууд өнгөрсөн шөнө боллоо. 14 дүгээр тойрогт “Ливерпүүл” багийн довтлогч Луйс Суарес өрсөлдөгч “Норвич Сити”-гийн хаалганд дөрвөн гоол оруулж, “покер” хийсэн. Ингэснээр Луйс Суарес Английн “Премьер лиг”-ийн түүхэнд нэг багийн эсрэг гурвантаа хэттрик хийсэн цорын ганц тоглогч боллоо. Тоглолтын дараа “Ливерпүүл” багийн дасгалжуулагч Брэндон Рожерс “Луйс Суарес бол дэлхийн шилдгүүдийн нэг” гэдгийг онцолсон.

Өнгөрсөн жил “Челси” багийн хамгаалагч Бранислав Ивановычийн гарнаас хазаж, арван тоглолтоор шийтгүүлсэн Уругвай довтлогч Луйс Суарес энэ жил гайхамшигтай сайн тоглож байна. Луйс Суарес өдгөө 26 настай.

Мөн 14 дүгээр тойрогт өнгөрсөн жилийн аварга “Манчестер Юнайтед” талбайдаа “Эвертон” багийг барсангүй 1:0-ийн харьцаатай хожигдлоо. “Манчестер Юнайтед” багийн дасгалжуулагч Дэвид Мойес хуучин багаа дийлсэнгүй. Тоглолтын 86 дахь минутад “Эвертон” багийн хамгаалагч Брайн Овиедо хожлын, гурван онооны чухал гоолыг оруулсан.

Лондоны “Челси” энэ жил тун муу тоглож буй “Сандерлэнд” багийн талбайд зочлон, 4:3-ын харьцаатай хожлоо. Энэ тоглолтод “Челси” багийн довтлогч Эдин Хазар хоёр гоолоор дубль хийсэн. Тоглолтын дараа “Челси” багийн дасгалжуулагч “Онцгой нэгэн” Жүзе Моуринью багийнхаа хамгаалалтад тун сэтгэл дундуур байгаагаа илэрхийлсэн.

“Бид өнөөдрийн тоглолтод хамгаалалтдаа үндсэн алдаануудаа гаргалаа. Сүүлийн зургаан минутад “Сандерлэнд” булангийн хоёр цохилтоо оруулсан бол бид 5-4 ээр хожигдох байлаа” гэж сэтгүүлчдэд ярьсан байна.

14 дүгээр тойргийн дүн:

• Кристал Палас 1-0 Уэстхэм Юнайтед

• Арсенал 2-0 Халл Сити

• Ливерпүүл 5-1 Норвич Сити

• Манчестер Юнайтед 0-1 Эвертон

• Саутхэмптон 2-3 Астон Вилла

• Стоук Сити 0-0 Кардифф

• Сандерлэнд 3-4 Челси

• Свонси Сити 3-0 Ньюкаслль Юнайтед

• Фулхэм 1-2 Тоттенхэм

• Уэст Бромбич 2-3 Манчестер Сити

Английн “Премьер лиг”-ийн 15 дугаар тойргийн тоглолтууд энэ амралтын өдрүүдэд болно.