Монголын ипотекийн корпораци жилийн найман хувийн хүүтэй орон сууцны ипотекийн зээлийг үргэлжлүүлэх үнэт цаасыг энэ сард гаргах гэж байна. Тодруулбал, энэ сарын дунд хэсэгт тус корпорациас 300 тэрбум төгрөгийн үнэт цаасыг гаргахаар болж, Санхүүгийн зохицуулах хороонд үнэт цаас гаргах тусгай зөвшөөрлийн материалыг бүрдүүлэн өгчээ.

Ийнхүү үнэт цаасыг гаргавал банкууд худалдан авч, цаашлаад үүнийг нь Монголбанк худалдан авах ажээ. Үндсэндээ орон сууцжуулах хөтөлбөр анх эхлэхдээ Монголбанк арилжааны банкуудад мөнгөн санхүүжилт байрлуулсан бол яваандаа үл хөдлөх хөрөнгөөр барьцаалсан үнэт цаасыг худалдан авах хэлбэрт шилжүүлж буй юм байна. Ингэснээр жилийн найман хувийн хүүтэй орон сууцны ипотекийн зээлийн санхүүжилт тасралтгүй үргэлжлэх талаар эдийн засагчид тайлбарлаж байгаа юм.