Монгол Улсын Ерөнхийлөгч Ц.Элбэгдоржийн хоёр дахь хүү Э.Эрдэнэ Өмнөд Суданд энхийг сахиулахаар алба хаан уржигдар эх орондоо ирж, аавынхаа гараас медаль хүртсэн юм. Тэсэхэд бэрх халуун уур амьсгалтай газар цэргийн алба хаана гэдэг нь тун хэцүүхэн бөгөөд тэрбээр есөн сарын туршид Монголынхоо 850 цэрэг эрстэй мөр зэрэгцэн энхийг сахиулах үйлсэд оролцсон. Энхийг сахиулагчдыг эх орондоо ирэхэд нь тосох арга хэмжээ  сэтгэл хөдөлгөм болж, ар гэрийнхэн нь алга ташин тосч авсан.

 Аавыгаа хүлээсэн нялх үрс, хүүгээ хайсан эцэг эх, амрагаа ширтэн буй бүсгүйчүүд туузны цаанаа тэсч ядан зогсох бөгөөд үүн дунд цагаан шубатай бүсгүй ялгаран зогсох нь харагдсан юм. Тэрээр Ерөнхийлөгчийн хоёр дахь хүү Э.Эрдэнийн найз бүсгүй бөгөөд анх удаа олны нүдэнд ил гарсан нь энэ байлаа. Энхийг сахиулагчид цэргийн аеродромын байр буюу ангорт орж ирж, цуваагаар заалыг тойрч алхан, ар гэрийнхэнтэйгээ уулзахад цагаан шубатай найз бүсгүй нь яаран очсон. Ийнхүү олны нүдэнд анх удаа гарч, хол газар удаан байсан яарч догдолсон хос тэврэлдэн байхад “Ерөнхийлөгчийн бэр болох хүн үү дээ”  гэж тэнд цугласан хүмүүс ярьцгааж байсан юм.