Уул уурхайн шавхагдах баялгаас илүү оюуны баялгийг алдаршуулах дэлхий нийтийн хандлагатай мөр зэрэгцэн алхаж, зэрэгцэхгүй мөртэй нэг нь байрандаа үлдэх энэ цагт бидний өмнө багагүй сорилт хүлээж буй. Тиймдээ ч кино сонирхогчдын хүсэл, тэмүүллийг өдөөсөн "48 цаг" кино наадамтай төстэй, асар их боломжийг олгодог олон улсын тэмцээнд монголын залуус оюуны хүчээ сорьж байна. Энэ бол АНУ-аас гаралтай, дэлхийн олон залуусыг эгнээндээ нэгтгэсэн  хамгийн соргог, шинэлэг санаа, шийдэлтэй бүтээлийг шалгаруулах  "Startup Weekend" олон улсын тэмцээн юм. Ингэхдээ 54 цагийн дотор онцгой шийдэлтэй бүтээгдэхүүн, программ хийх ёстой бөгөөд улсаа төлөөлөх баг шалгарсаны дараа хоёр үе шаттайгаар "Global Startup Battle" олон улсын тэмцээнд өрсөлдөх ажээ. Ийнхүү Монголыг төлөөлөх хоёр баг бүтээлээ 54 цагийн дотор хийн өрсөлдөж, шалгарсан байна. Одоогоор тэмцээний эхний шат болох онлайнаар санал авах шалгаруулалт болж буй ажээ.

Энэ талаар Монголыг төлөөлөх багийн нэг нь болох "Wiki numbers" багийн ахлагч, гар утасны программ хөгжүүлэгч Ц.Наранбаяраас тодрууллаа.

-Монголыг төлөөлж танай баг ямар программ хангамжийн бүтээгдэхүүнээр оролцож байгаа вэ. Мөн багийнхаа гишүүдийг танилцуулбал?

-Манай программын уриа Бүх зүйлийг тоогоор илэрхийлэх боломж. Бидний зохиосон Wiki numbers гар утасны аппликэшн маань хэрэглэгчдэд суурилсан статистикийн программ гэх үү дээ. 140 тэмдэгтэд тааруулан хэн бүхэн манай программд мэдээллээ оруулж болохоороо онцлог. Энэ нь статистик тоо баримтад суурилсан мэдээллийн сан үүсгэх зорилготой. Ингэснээр тоо баримттай мэдээллийг эндээс унших, мөн өөрөө оруулах боломжтой юм. Мэдээллийн эрин зуунд өөрт байгаа мэдээллээ бусадтай хуваалцах нь олон нийтийн хэрэгцээ, шаардлага, хандлага болчихоод байна л даа. Манай баг надтай нийлээд UI/UX чиглэлийн дизайнер Г.Эрдэнэбаатар, Б.Хосбат, Гар утасны программ хөгжүүлэгч Б.Цэрэнсодном, Веб хөгжүүлэгч Х.Баясгалан гэсэн таван гишүүний бүрэлдэхүүнтэй.

-Тэмцээнд хэдэн орны залуус оролцож байгаа бол. Эхний шатны шалгаруулалт хэрхэн болж байна вэ?

-Энэ жилийн "Global Startup Battle" тэмцээнд 110 орны 400 орчим хотоос 240 баг оролцож байгаа. Ингэхдээ улс бүр төлөөлөх багаа шалгаруулах тэмцээнээ зохион байгуулсан. Бидний хувьд өнгөрөгч баасан гарагаас эхлээд 54 цагийн дотор бүтээлээ хийсэн бөгөөд нийт найман баг өрсөлдөж хоёр баг шалгарсан. Үүний хэг нь манай Wiki Numbers баг. Нөгөө баг маань Eco Green House гэдэг нэртэй. Үндсэндээ улсаасаа шалгарсан бүтээлээр олон улсын тэмцээнд оролцох юм. Одоогоор тэмцээний эхний шат http://globalstartupbattle.agorize.com/en/juries/11/votables?votable_id=554  сайтаар онлайн санал асуулгаар үргэлжилж байна. Дэлхийн өнцөг булан бүрт байгаа онлайн хэрэглэгчдийн саналаар эхний шатны шалгаруулалтыг дүгнэх юм. Санал асуулгын дүнгээр нийт 240 багаас 15 нь шалгарч дараагийн шатанд өрсөлдөнө. Тэр 15 баг хоёрдугаар шатанд өрсөлдөж, шилдэг гурван багийг шүүгчдийн дүнгээр шалгаруулах юм. Хэрэв бидний бүтээл их санал авч чадвал ийнхүү хоёр дахь шат руугаа орж өрсөлдөх боломжтой гэсэн үг.

-Онлайн санал асуулгын шалгаруулалт хэзээ хүртэл үргэлжлэх вэ?

-Санал асуулга Улаанбаатарын цагаар арванхоёрдугаар сарын 7-ны 16.00 цаг хүртэл үргэлжилнэ. Одоогоор бид 240 орноос 27 дугаарт явж байна. Хүмүүс дэмжвэл бид үүнээс ч дээшээ гарах боломж бий.

-Тэмцээнд оролцох программаа хийхэд саад, бэрхшээл тулгарч байсан уу?

-Саад, бэрхшээл гэхээр юм байсангүй. Startup Weekend Mongolia-н Ментор зөвлөхүүд тусалж дэмжиж байсан. Олон улсын тэмцээн учраас нарийн зохион байгуулалттай.  Жишээ нь, бидний хийсэн бүтээлийг ямар талбарт гаргах, байрлуулах гэх зэргээр бүх бааз суурийг хангаж өгсөн учраас бид зөвхөн шинэ санаа, шийдлээ л сайтар боловсруулах нь чухал байлаа.

-Амжилт үзүүлж, шилдэг гуравт багтвал ямар боломж эдлэх вэ?

-Энэ бол олон улсын том тэмцээн учраас ялагчдад асар их боломж олгож байгаа юм. Бидний сайн мэдэх Гүүгл компани ерөнхий ивээн тэтгэгчээр ажиллаж байгаа бөгөөд Нэгдүгээр байрт шалгарвал 20 мянган ам.доллар, олон улсын хурал семинарт оролцох эрх, Гүүгл компанийн төв байр луу очиж, үйл ажиллагаатай нь танилцах, мэргэжилтнүүдтэй санал солилцох, зөвөлгөө авах боломжтой. Хоёр, гуравдугаар байранд шалгарвал 10 мянган ам.доллар, мөн Гүүгл компанитай танилцах, санал солилцох эрхийг өгөх юм. Энэ нь программ хангамжийн салбарт ажиллагсадын хувьд маш том боломж, олон улсын зах зээлд гарахад нэгэн түлхэц болох юм.

-Энэ тэмцээнд Монголоос анх удаа оролцож байгаа юм уу?

-Үгүй. Урьд нь хоёр жилийн өмнө буюу 2011 онд Peepp баг Монголоос баг зураг оруулдаг олон нийтийн сүлжээ сайтын бүтээлээр оролцож нэлээд амжилттай, долдугаар байрт шалгарч байсан. Тэгэхээр монголчуудад боломж бий гэсэн үг л дээ. Өнгөрсөн жил Ger-L төсөл амжилттай оролцож байсан.

Монголын “Wiki  Numbers” багт санал өгөх холбоос:  

www.globalstartupbattle.agorize.com

Танилцуулгыг энд дарж үзнэ үү.

www.youtube.com