Тайландад олон нийтийг ха­марсан жагсаал зургаа дахь өд­рөө үргэлжилж байна. Жагсагчид одоогийн Ерөнхий сайд Йинглак Чинаватраг огцрохыг шаардаж байгаа юм. Учир нь түүнийг эх орноосоо хөөгдсөн төрсөн ах Таксин Чинаватрагийн заавраар үйл хэргээ үргэлжлүүлж байгаа гэсэн хардлага тус улсад байсан. Улмаар ахыгаа өршөөлийн хуульд хамруулсан нь энэ асуудлыг улам дэвэргэсэн билээ. Эрх баригч на­мын баталсан өршөөлийн хуульд Ерөнхий сайдын ах багтсан нь ийнхүү олныг бухимдуулах бол­сон гэж ажиглагчид үзэж байна.

Гэхдээ дээрх жагсаал цуглаа­ныг одоогийн Тайландын парламен­тад цөөнх болсон сөрөг хүчнийхэн далдуур зохион байгуулж байгаа гэсэн хардлагыг хэвлэлээр цацаж байгаа юм. Одоогоор Засгийн газ­рын яамдууд, агентлагууд болон за­рим төрийн салбарууд үйл ажил­ла­гаагаа бүрэн зогсоогоод байна. Дэл­хийн олон зуун хэвлэл мэдээл­лийн агентлагууд гол анхаарлаа үүнд хандуулсаар.

Жагсаал энэ хэвээр үргэлжлэх юм бол цэргийнхэн хүч хавсаргаж, цэргийн эргэлт болох магадлалтай гэж ажиглагчид тайлбарлаж байна. Гэхдээ Тайландын цэргийнхэн одоогоор хэрхэх талаар ямар нэг шийдвэр гаргаагүй байгаа гэдгийг онцолсон. Мэдээж нийгэмд энэ хэвээр эмх замбараагүй байдал үргэлжлэх юм бол яаралтай арга хэмжээ авч, жагсаалыг тарааж, Засгийн газрыг татан буулгах бо­лов уу.

Засгийн газрын яам, агент­лагуудын ажилчид дотроосоо түг­жээтэй байгаа талаар зарим хэв­лэл мэдээлсэн. Мөн цагдаагийн­хан Гадаад хэргийн яам, Дотоод хэр­гийн яам, гурван агентлагийг хам­гаалалтад авсан аж. Ерөнхий сайд өөрийн биеэр хэвлэлийн бага хурал зарлан байр сууриа илэрхийлсэн юм. Тэрбээр “Та бүхэн ямар учир шалтгааны улмаас ийнхүү намайг огцрохыг шаардаж байгаагаа дахин тодорхой илэрхийлнэ үү. Би төрсөн ахыгаа эх орондоо ясаа тавиасай гэж хүссэндээ дээрх өршөөлийн хуульд хамруулсан гэдгийг хэлмээр байна. Хэрэв намайг ахтай минь холбон огцрохыг шаардаж байгаа бол хүндхэн л асуудал болов уу. Би ард түмнийхээ итгэлийг хүлээн шударгаар өөрт оноогдсон албан үүргээ гүйцэтгэж яваа жи­рийн нэг улстөрч. Сөрөг хүчний­хэн өнөөдрийн жагсаалыг зохион байгуулж, дунд нь орж ард түмнийг турхирч байгаад харамсаж байна” хэмээжээ.

Улсын хэмжээнд онц байдал зарласан. Хилээ хааж, олон нийтийн ямар нэг арга хэмжээг цуцалсан. Дотоод хэргийн сайд цэргийнхэнд хандан “Засгийн газрыг огцруулах жагсаалд цэргийнхэн оролцохгүй байна гэдэгт итгэж байна” хэмээн мэдэгдсэн. Түүний энэ мэдэгд­лийн дараа жагсагчид ч өөрсдийн төлөөллөө илгээн, байр сууриа илэрхийлэх хүсэлтэй байгаагаа хэвлэлийнхэнд мэдэгдсэн аж. Ингээд таван хүний төлөөлөл бү­хий жагсагчид гудамж талбайд өөрс­дийн дуу хоолойгоо илэрхийл­жээ. Тэд Засгийн газрыг, Ерөнхий сайд­тай хамт огцрохыг л шаардаж бай­гаа гэдгээ мэдэгдэв.

Ерөнхийдөө өдөр нь тав, зургаан цагийн жагсаал цуглаан болж, шө­нө нь зарим хотын гудамжуудаар дээрэм тонуул болж байгаа тул цэргийнхэн болон цагдаагийнхан хоёр ээлжээр эргүүл хийж байгаа аж. Улсын онцгой бүсд хамаарагдах, эрчим хүч, цахилгаан холбоо, нисэх буудал, автотээвэр зэрэг газруу­дад хараа хяналт дээд зэрэгт бай­гаа гэдгийг Тайландын Цагдаагийн ерөнхий газраас мэдэгдсэн билээ.

Гудамж талбайгаар хүмүүс ажил төрөл хийхгүй, зүгээр л амарч, юу хүссэнээ хийж байна. Олон улсын худалдааны төв, их дэлгүүрүүд бүгд үүд хаалгаа хаасан ч дотор нь дэлгүүрийн эзэд нь бараагаа хул­гайд алдахгүйн тулд буутай манаанд гарч байгаа талаар ч зарим эх сур­вал­жууд мэдээлсэн. Олон улсын ажиг­лаг­чид ч Тайландын нөхцөл байдалд ганц л дүгнэлт хийгээд байгаа. Тэр нь тун энгийн. “Хэзээ дүү нь ахыгаа сул­лах бол” гэсэн тэр л хүлээлтийг сө­рөг хүчнийхэн хүлээж байсан мэт.

Тайландын эдийн засгийн нөх­цөл байдал чухал үе дээр ирээд байгаа гэдгийг Ерөнхий сайд онцолсон юм. Мөн Боловсро­лын сайд Чатурон Чайсенг “Пеу Тхай нам Засгийн газрыг болон Ерөн­хий сайдыг огцорсны дараах бүх зүйлийг зохицуулах байр суурь илэрхийлсэн байгаа” хэмээжээ. Сөрөг хүчний гишүүн Боловс­ро­лын яамыг хариуцан ажилладаг бө­гөөд энэ нь өмнө “төлөвлөгд­сөн бай­сан” гэсэн таамгийг баталгаа­жуу­лаад байгаа юм. 

Ямартай ч Ерөнхий сайд Йинг­лак Чинаватра огцрох үндэслэлийг хүлээн авахгүй гэдгийг мэдэгдсэн бөгөөд хууль зүйн үүднээс ч жагсагчдын тавьсан шаардлагыг хүлээн авах боломжгүй гэдгийг холбогдох хуулийнхан мэдэгдсэн юм. Хамгийн гол нь жагсаал хийж байгаа иргэд энэ хэвээр үргэлжлэх юм бол нийгэмд байдал хурцдаж, цэргийнхэн дэмжинэ, эсвэл цэвэр­лэх хоёр зам байгааг ажиглагчид тайлбарласаар.

Жагсаал, цуглааны үеэр ямар нэг хүн амиа алдсан талаар мэдээлэл байхгүй байгаа бөгөөд гэмтэж бэртсэн иргэд цөөнгүй харагдаж байсан талаар Тайландын хэвлэл онцолсон. Харин эмнэлгүүд бүгд хэвийн ажиллаж байгаа гэдгийг CNN агентлаг мэдээлсэн. Тайлан­дын жагсаалаас ганц зүйл тодор­хой болсон юм. Хэдий Йинглак Чинаватраг ард түмэн хүндэлж, Ерөнхий сайдаар томиолсон ч гэсэн түүний ахыг хэзээ ч хүлээн зөвшөөрөхгүй гэдэг нь ойлгомжтой болж байна. Мөн сөрөг хүчний­хэн ард түмний тархийг нь угаах хангалттай хүчтэй гэдгийг давхар харуулж байгаа талаар хэвлэлүүд онцолжээ.