Египетийн шүүх төрийн эрхээс зайлуулагдсан экс Ерөнхийлөгч Мухаммед Мурсийг дэмжигчдийн жагсаалд оролцсон 21 эмэгтэйд 11 жил шоронд хорих ял оноожээ. Эдгээр эмэгтэйчүүдийн долоо нь насанд хүрээгүй учраас хүүхдийн шоронд ял эдлэх гэнэ. Тэд өнгөрсөн аравдугаар сард Александриа хотод гарсан томоохон бослогын үеэр баривчлагдсан аж. Шүүхээс тэднийг террорист бүлэглэлтэй нэгдсэн, автозамын хөдөлгөөнд саад учруулсан, хорлон сүйтгэх ажиллагаа явуулсан зэрэг олон төрлийн хэрэгт буруутгажээ.

Түүнчлэн Египетийн шүүх Мурсийн талын “Мусульман ахан дүүс” хөдөлгөөний зургаан лидерт бослого, үймээн өдүүлсэн хэргээр 15 жил шоронд хорих ял оноосон байна. Мөн “Мусульман ахан дүүс” хөдөлгөөнийхнийг дэмжсэн 17 шашны хуврагыг сүмийн номлолыг ашиглан иргэдийг бослогод уриалсан хэмээн баривчлаад байгаа юм.

Египетийн хүчнийхэн өнгөрсөн зургадугаар сард Ерөнхийлөгч Мухаммед Мурсийг эсэргүүцсэн иргэдийн жагсаалыг далимдуулан цэргийн эргэлт хийж, төрийн эрхийг булааж авсан билээ. Үүнээс хойш Мурсийг дэмжсэн олон зуун баривчилж, “Мусульман ахан дүүс” хөдөлгөөний лидер, гишүүд, дэмжигчид хомроглон баривчлах ажиллагаа эхэлсэн юм.