Авлигын эсрэг парламентын бүлгийн гишүүд Төрийн ордонд мэдээлэл сонсох уулзалт хийлээ. Уулзалтанд УИХ-ын гишүүн Р.Бурмаа, С.Ганбаатар, С.Бямбацогт, М.Батчимэг, Ж.Энхбаяр, С.Одонтуяа  нар оролцсон бол АТГ-аас тус газрын дарга Н.Ганболд нарын удирдах албаныхан оролцсон байна. Уг уулзалтанд Авлигатай тэмцэх газраас  Нэгдсэн үндэсний байгууллагын Авлигын эсрэг конвенцийн хэрэгжилт Монголын хувьд ямар байгаа тухай, ямар асуудал, хэрхэн шийдвэрлэж буй талаар танилцуулсан байна.

Монгол Улс нь НҮБ-ын Авлигын эсрэг конвенцид элссэн анхдагч орнуудын тоонд багтаж байсан шигээ конвенцийн хэрэгжилтээ үнэлүүлэх хүсэлт гаргасан улсуудын анхдагчдийн нэг болсон аж.

Уг конвенцийг хэрэгжүүлэхтэй холбоотой зөвлөмж гарсан бөгөөд нэлээд зөвлөмжийг нь хууль тогтоомжоо боловсронгуй болгох замаар хэрэгжүүлчихсэн аж. Мөн тодорхой зарим асуудлууд ч шийдлээ хүлээсэн хэвээр буй гэнэ.

Үүнээс онцловол, авлигын эс үйлдэхүйг гэмт хэрэгт тусгаагүй, эрүүгийн хариуцлага хүлээлгэх босго бага байдаг, АТГ нь орон нутагт нэгжгүй, маш олон хуульд албан хаагчийн халдашгүй байдлыг тусгасан, албан тушаалтны бүрэн эрхийг түдгэлзүүлэх хүсэлтийг хангахгүй байгаа дээд албан тушаалтныг хэрхэх тухай заагаагүй, гэрч хохирогчийн эрхийг хамгаалах хуультай болж байгаа ч мэдээлэгчийг хамгаалах талаар тусгадаггүй зэрэг шалтгаанууд хамаарч буй аж.