Энэ сарын 13-аас эхлэн X дугаар хорооллын гэрэл дохиотой уулзвараас 25 дугаар эмийн сангийн уулзвар хүртлэх зам засварын ажил эхэлж, баруунаасаа зүүн тийшээ явах тээврийн хэрэгслийн хөдөлгөөнийг хязгаарласан билээ. Үүнтэй холбоотойгоор хаалттай байх хугацаанд нийтийн тээврийн үйлчилгээний автобусуудын чиглэлийг өөрчилжээ.

Тухайлбал "Сонсголон", "МУИС-Таван шар", "Орбит-40 мянгат", "Нарангийн гол-Ард кино театр" зэрэг чиглэлийн автобус баруунаас ирэхдээ X хорооллын буудалд зогсоно. Уулзвараар буцаж эргэн Саппорогийн уулзвараар III, IV хороолол руу өгсөж хорооллын голын замаар явж Амарсанаагийн гудамжаар уруудан Энхтайваны өргөн чөлөө буюу төв замдаа орох юм байна.

Харин зүүнээс ирэхдээ Баруун дөрвөн замын уулзвараас Амарсанаа, Жалханз хутагт Дамдинбазар, Дилавхутагт Жамсранжавын гудамжаар явж, Гэмтлийн эмнэлгийн урд уулзвараар уруудан Саппорогийн уулзвар хүрч үндсэн чиглэлээр явах аж.

 "Зүүн салаа-XIII хороолол-Зах", "Чулуун овоо-Ботаник" чиглэлийн автобус Х хорооллын буудалд зогсоод уулзвараар баруун гар тийш эргэн Нарны зам руу (Гермес төв) орж Вокзалаар тойрон Магсаржавын гудамжаар өгсөн “ТБД Андууд” буудал хүрч Сөүлийн гудамжаар Энхтайваны өргөн чөлөөнд орж үндсэн чиглэлээр явна.

Мөн Улаанхуарангаас IV хороолол чиглэлийн автобусууд зүүнээс ирэхдээ Амарсанаа, Жалханз хутагт Дамдинбазар, Дилавхутагт Жамсранжавын гудамжаар явж баруун гар тийш эргэн Энэбишийн гудамжинд ороод, буцаж Амарсанаагийн гудамжаар уруудан үндсэн чиглэлдээ явах юм байна.

П.Наран