Сочигийн олимпийн өмнөх сорил болох “Grand Friх” финалд ирэх сарын 5-8-ны өдрүүдэд Японы Фүкүока хотноо болно.

“Grand Friх”-д улирлын зургаан цуврал тэмцээний хоёрт нь оролцож, амжилтаараа эхний зургаад багтсан ганцаарчилсан, хосын болон бүжгийн хосын шилдэг гулгагчид оролцдог. Өнгөрөгч амралтын өдрүүдэд ОХУ-ын Гран При тэмцээн болж, шилдэг гулгагчид тодроод байна. Энэ жилийн “Grand Friх” нь ирэх олимпийн наадмын өнгийг тодотгож өгч байгаагаар онцлог болж буй. Хэдийгээр эмэгтэйчүүдийн төрөлд БНСУ-ын Ким Юүна бэртлийн улмаас оролцож чадаагүй ч тэрбээр ирэх сард Хорватад болох тэмцээнд оролцохоо мэдэгдээд байгаа.

Ингээд энэ жилийн “Grand Friх”-д эмэгтэйчүүдийг дэлхийн хошой аварга, олимпийн мөнгөн медальт Японы Мао Асада, ОХУ-ын залуу уран гулгагч Юлия Липницка, дөрвөн тивийн аварга АНУ-ын Эшли Вагнер нар шалгарсан. Харин 3-4-р байрт ОХУ-ын гурван залуу уран гулгагч багтаж, анх удаа шилдэг зургаад өрсөлдөх эрхийг аваад байна. Тухайлбал, залуучуудын дэлхийн аваргын хүрэл медальт, 15 настай Анна Погорилая, Залуучуудын дэлхийн аварга, Европ тивийн мөнгөн медальт, 17 настай Аделина Сотникова нар багтсан. Харин дэлхийн аваргын хүрэл медальт Японы Акико Сузуки, дэлхийн аварга, Европын таван удаагийн аварга Италийн Каролина Костнер нарыг ардаа орхиж шилдэг зургаад багтсан тамирчин бол Елена Радионова юм. Энэ жил 14 настай Елена Радионова энэ улирлын Америкийн Гран прид гуравт, Японы Гран прид хоёрт орсноор шилдэг зургаад өрсөлдөх эрхийг авлаа. /Видеог хавсаргав/.

Эрчүүдийн хувьд дэлхийн гурван удаагийн аварга, рекорд эзэмшигч Канадын Патрик Чан, дөрвөн тивийн мөнгөн медальт Японы Тацуки Мачида, дэлхийн аваргын хүрэл медальт Юүзүри Ханю нарын шилдгүүд багтсан. Мөн Европ тивийн тавдугаар байрын шагналт ОХУ-ын Максим Ковтун, олимпийн хүрэл медальт, дэлхийн аварга Японы Дайсуки Такахаши, дөрвөн тивийн хүрэл медальт БНХАУ-ын залуу уран гулгагч Ян Хань нар үзүүлсэн амжилтаараа шилдэг зургаад багтжээ. Патрик Чан энэ сарын дундуур болсон Францын Гран При тэмцээнд 295.27 оноог авснаар дэлхийн шинэ рекордыг тогтоогоод байна. (видеог хавсаргав.) Түүний хувьд 2011 онд Москвад болсон дэлхийн аваргад 280.98 оноог тогтоож байсан үзүүлэлтээ ийнхүү Францын Гран при тэмцээнд ахиулсан байгаа. Дэлхийн аваргад гурван удаа түрүүлээд байгаа Патрик Чан 2010 оны Ванкуверын өвлийн олимпод тавдугаар байр эзэлсэн. Түүнд одоо олимпийн медаль л дутуу байгаа.

Хосын болон бүжгийн хосод мөн шилдэг хосууд шалгараад байна. Ийнхүү Сочигийн олимпийн наадмын сорил болох “Grand Friх” ирэх сарын 5-8-ны өдрүүдэд Японы Фүкүока хотноо болно.