Дэлхийн 190 орны арван мянга гаруй төлөөлөгч оролцсон Уур амьсгалын өөрчлөлтийн асуудлаарх НҮБ-ын бага хурал Польш улсын нийслэл Варшав хотод өнгөрсөн долоо хоногт болсон. Бага хурлаар уур амьсгалын өөрчлөлтийн улмаас улс орнуудад учирч байгаа саад бэрхшээлийг арилгах, олон улсын хэмжээнд дагаж мөрдөх шинэ баримт бичиг боловсруулах асуудлыг хэлэлцсэн юм.

Бага хурлын дээд хэмжээний хуралдаан дээр Монгол Улсыг төлөөлж Байгаль орчин, ногоон хөгжлийн Дэд сайд Б.Тулга үг хэлсэн. Тэрбээр дэлхийн уур амьсгалын өөрчлөлтийг сааруулахад чиглэсэн арга хэмжээг нэн яаралтай авах шаардлагатай байгааг тэмдэглэж, 2015 оноос батлан мөрдөж эхлэхээр төлөвлөж байгаа шинэ баримт бичигт уур амьсгалын өөрчлөлтөд илүү ихээр өртөж байгаа, хөгжиж байгаа улс орнуудад дэмжлэг үзүүлэхэд чиглэсэн дасан зохицох, технологи дамжуулах, санхүүгийн механизм бүрдүүлэх талаар тодорхой заалтууд оруулах шаардлагатай байгааг тэмдэглэжээ.

Мөн тэрбээр хүлэмжийн хийн ялгаралтыг бууруулахад  өндөр хөгжилтэй болон хөгжиж байгаа орнууд хамтран ажиллах нэг чухал арга зам нь хамтарсан кредит олгох механизм байж болохыг Япон-Монгол Улсын хооронд энэ оны эхээр байгуулсан түншлэл харуулж байгааг хэлсэн байна.