Хүүхдийн эрхийн тухай конвенцийн өдрийг тохиолдуулан Ерөнхий сайдын тэргүүлдэг Хүүхдийн төлөө үндэсний зөвлөл II хуралдаанаа хийж, хүүхдийн эрх хамгааллын нөхцөл байдал, тэдний эрхийг хангах салбар дундын зохицуулалтыг хэлэлцлээ.

Зөвлөл өмнөх жилүүдэд дорвитой бүтээлч ажиллаж чадаагүй, жилд цөөн удаа хуралдахад зөвлөлийн бүрэлдэхүүнд багтдаг төрийн байгууллагын удирдлагууд төлөөний хүнээ явуулчихдаг жишиг тогтсоныг шүүмжиллээ. Улсын хэмжээнд 500 гаруй нийгмийн ажилтан ажилладаг ч тэд одоо сум, хорооны Засаг даргын туслах болчихоод байна, иймд нийгмийн ажилтнуудыг ХТҮГ-ын харъяанд шилжүүлж, үйл ажиллагааг нь нэгтгэе. Сургуулийн урлаг, спортын танхимыг ССАЖЯ-нд хариуцуулж, шинэ менежмент хийе. Хэвлэл мэдээллийн хэрэгслээр гаргаж буй кино, нэвтрүүлгийн агуулгад анхааръя, гэртээ суугаад интернэтээр хэсч байгаа хүүхдийг эрсдлээс хянах арга хайя. Төрийн байгууллагын зарим чиг үүргийг төрийн бус байгууллагуудад шилжүүлье зэрэг саналыг зөвлөлийн гишүүд гаргалаа.

Монгол бол хүүхдийн эрхийг хамгаалсан сайн хуультай, хүүхдэд чиглэсэн нийгмийн үйлчилгээгээ хүртээмжтэй хүргэж чаддаг. Вакцинжуулалт, хоол тэжээлийн нөхцөл, сургуульд хамрагдалт гэх мэт олон үзүүлэлтээр дэлхийд дээгүүрт ордог. Гэхдээ үйлчилгээний чанар сул, салбарын төрийн болон оролцооны байгууллагуудын уялдаа муу зэрэг дутагдал бий гэж олон улсын байгууллагын төлөөлөл хэллээ. Хүүхэдтэй холбоотой санал гомдлын тоо 80 хувь өссөн ч шийдвэрлэсэн дүн хангалтгүй, хүүхдийн эрхийг хамгаалах, хөгжлийг нь дэмжих ажил Монголын 900 мянган хүүхдийн ердөө 10 хувьд л хамааралтай болсон гэж зарим төлөөлөл онцолсон юм.

Төрөөс хүүхдийн төлөө зарцуулж буй төсөв мөнгө чамлахааргүй ч тэдэнд чиглэсэн үйлчилгээний чанар муу байгаа нь ажлын уялдаа, зохион байгуулалтаас шалтгаалж байна гэж Ерөнхий сайд Н.Алтанхуяг хэллээ. Өмнө олонтаа ярьсаар ирсэн дээрх асуудлуудыг богино хугацаанд үр дүн гаргаж шийдвэрлэхийн тулд тодорхой үйлдлүүд хийж, ажлын хэсгүүд байгуулж ажиллахыг зөвлөлийн гишүүдэд даалгалаа. Түүнчлэн, зөвлөлийн хуралдааны давтамжийг ойртуулж, улирал бүрт уулзан ажлаа дүгнэж байхыг үүрэг болголоо. Ирэх оны тухайд 2, 5, 8, 11 дүгээр сард Хүүхдийн төлөө үндэсний зөвлөлийн ээлжит хуралдааныг товлолоо. Бэлгэдлийн төдий ажиллаж ирсэн тус зөвлөлийн үйл ажиллагааг хариуцлагажуулахад хүч, анхаарал тавьж байгаа Шинэчлэлийн Засгийн газрын тэргүүнд салбарын байгууллагууд талархалтай байна.

Зөвлөлийн хуралдааны дараа "Хүүхдийн эсрэг бүх төрлийн хүчирхийллийг таслан зогсоое" сэдэвт дэлхийн санаачилгад нэгдэх ёслолд Ерөнхий сайд Н.Алтанхуяг оролцсон юм. НҮБ-ын Хүүхдийн сангаас конвенцид нэгдсэн орнуудын хүүхдийн эрхийн төлөв байдалд хийсэн судалгаанд үндэслэн энэ жил "Хүүхдийн эсрэг бүх төрлийн хүчирхийллийг таслан зогсоое" дэлхийн санаачилгаөрнүүлж байна.Нуугдмал, далд хэлбэрийн хүчирхийллийг ил болгоход энэ санаачилга чиглэгджээ. Энэ үеэр хүүхдийн оролцооны байгууллагууд үйл ажиллагаагаа нээлттэй танилцуулж, “Хүүхэд буруугүй” дууг олон нийтэд хүргэлээ.

Хүүхдийн эрхийн тухай конвенцийг НҮБ-ын Ерөнхий Ассамблей 1989 оны 11 дүгээр сарын 20-нд баталснаас хойш 193 орон нэгдэн орсон нь хүн төрөлхтний түүхэн дэх хамгийн олон улс орон баталсан хүний эрхийн хэлэлцээр болжээ. Манай улс 1990 онд нэгдсэнээс хойш Хүүхдийн эрхийн конвенцийн хэрэгжилтийн талаар үндэсний тайлан илтгэлээ НҮБ-ын Хүүхдийн эрхийн хороонд дөрвөнудаа явуулсан байдаг. Монгол Улс тав дахь тайлан илтгэлээ 2014 оны 10 дугаар сарын 20-нд НҮБ-ын Хүүхдийн эрхийн хороонд өргөн барина гэж Засгийн газрын Хэвлэл, мэдээлэл олон нийттэй харилцах албанаас мэдээллээ.