УИХ-ын Хууль зүйн байнгын хорооны хуралдаанд өнөөдөр дөрөвхөн гишүүн ирэв. Байнгын хорооны дарга ирээгүй тул тус хуралдааныг УИХ-ын дэд дарга Р.Гончигдорж даргаллаа. Харин хуралдаанд УИХ-ын дарга З.Энхболд, УИХ-ын гишүүн Р.Бурмаа, Ж.Батзандан, УИХ-ын гишүүн, Хууль зүйн сайд Х.Тэмүүжин нар оролцож, Шүүхийн иргэдийн төлөөлөгчийн эрх зүйн байдлын тухай хуулийн зарим заалт Үндсэн хуулийн холбогдох заалтыг зөрчсөн эсэх тухай маргааныг хянан шийдвэрлэсэн тухай Үндсэн хуулийн цэцийн 2013 оны 04 дүгээр дүгнэлтийг хэлэлцсэн юм. Уг асуудлыг өнөөдрийн хурлаар хэлэлцээд “Хүлээн авах боломжгүй гэсэн” шийдвэр гаргаж, чуулганд оруулахаар болсон юм. 

Хуралдааны үйл явц тун цомхон болж, УИХ-ын гишүүн Ж.Батзандан асууж, Хууль зүйн сайд Х.Тэмүүжин хариулаад л үндсэндээ дууссан гэхэд болно. Гэтэл Байнгын хороо бүрт 19 орчим гишүүн харьяалагддаг. Хуульд зааснаар Байнгын хорооны хуралдаанд оролцож байгаа гишүүдийн ирц 50 хувийг давах ёстой. Өөрөөр хэлбэл, гишүүдийн ирц 50 хувийн босгыг давсан нөхцөлд хуулийн төслийг хэлэлцэх боломжтой болдог. Энэ нь Байнгын хорооны хуралдаанд оролцож байгаа гишүүдийн тоо 11-д хүрсэн нөхцөлд 50 хувийн босгод хүрчээ гэж тодорхойлж болно. Гэвч энэ удаад дөрвөн гишүүн оролцуулж байгаад “Үндсэн хуулийн цэцийн дүгнэлтийг хүлээж авах боломжгүй” гэж шийдвэрлэлээ. Маргаан үүсвэл яах вэ. “Гишүүд хуралдаандаа суугаагүй юм чинь өөр яах байсан юм бэ” гэж сөрөх үү. Эсвэл төсөв, мөнгөний бодлого батлагдчихаар бусад асуудал урсгалаараа иймэрхүү замаар урсаад өнгөрдөг гэж ойлгох уу.