УИХ-ын гишүүн М.Зоригт буруу талдаа жолооны хүрд бүхий тээврийн хэрэгслийн импортыг хориглох тухай УИХ-ын тогтоолын төсөл санаачилж, өргөн бариад байгаа аж. Тэрбээр “Өнөөдөр манай улсын нийт суудлын автомашины 66 хувь нь буруу талдаа жолооны хүрдтэй байна.  Монгол Улсын хууль дүрэм, “буруу талдаа” гэж нэрлэж заншталаа хүлээж авсан нь болохоо байсан үзүүлэлт” гэжээ. Мөн тэрбээр  зөв талдаа жолооны хүрдтэй машиныг хориглох талаар ч бодож үзсэн гэнэ. Гэвч хууль дүрэм, гэрэл дохио,  зам гэхчилэн бүгдийг өөрчлөх хэрэгтэй болох учир нэгэнт тогтсон зүүн талын дүрмээ баримталж, автомашиндаа зохицуулалт хийх чухал гэж үзжээ.

Тэгвэл түүнийг ийн хуулийн төсөл боловсруулсаныг сонссон зарим иргэд  Европоос автомашин оруулж ирдэг бизнесээ авч үлдэхийн тулд ингэж байна хэмээцгээж байна. Ямартаа ч М.Зоригтын зорилго бүтвэл ирэх 2015 оноос буруу талдаа жолооны хүрдтэй автомашины импортыг хориглох аж. Харин иргэдийн хувьд энэ хуулийн төсөл батлагдвал Монголд баячууд машин унаж, борчууд явган алхдаг тогтолцоо руу шилжих нь ээ хэмээн эмзэглэж байгаа юм. Тэр тусмаа монголчуудын унаж байгаа машины 66 хувь нь буруу хүрдтэй гэхээр Монголд зөв хүрдтэй машин унадаг хүмүүс зөвхөн баячууд л байх бололтой. Нийтийн тээврийн хэрэгсэлээ сайжруулаагүй цагт энэ хуулийн төсөл батлагдвал олон хүнийг явгалж магадгүй хэмээн эсэргүүцэх нэгэн нь ч байна.